कोरोना विरुद्ध पहिलोपटक मानिसमा गरिएको खोप परीक्षण सफल भएको दाबी

काठमाण्डौं, ०६ जेठ -कोरोना भाइरसविरुद्ध पहिलोपटक मानिसमा गरिएको खोप परीक्षण सफल भएको दाबी गरिएको छ । परीक्षणका क्रममा खोपले रोग प्रतिरोधक क्षमता वृद्धि गरेको जनाउदै उत्पादक कम्पनीले परीक्षण सफल भएको दाबी गरेको हो ।

पहिलो चरणमा आठ जना स्वस्थ व्यक्तिमा गरिएको परीक्षण नतिजा सोमबार सार्वजनिक गर्दै उत्पादक कम्पनी मोडर्नाले भनेको छ, ‘आठ जना स्वस्थ स्वयंसेवीहरूमा गरिएको परीक्षणबाट यो खोप सुरक्षित देखिनुका साथै रोग प्रतिरोधक क्षमता बढाउन सफल भएको छ।’कम्पनीले गत मार्च महिनाबाट खोपको मानवीय परीक्षण सुरू गरेको थियो। परीक्षण क्रममा आठ जना स्वस्थ स्वयंसेवीलाई दुईचोटि खोप लगाइएको कम्पनीले जनाएको छ।

यो खोप लगाएपछि रगतमा रोगसँग लड्ने ‘एन्टिबडी’ विकास भएको थियो। उक्त एन्टिबडीको प्रयोगशाला परीक्षण गर्दा त्यसले शरीरभित्र कोरोना भाइरस फैलिनबाट रोक्न सक्ने देखिएको छ।