कोरोना संक्रमणका कारण २४ घण्टामा ६८ जना संक्रमितको मृत्यु

काठमाडौं, जेठ २२ – नेपालमा पछिल्लो २४ घण्टामा कोरोना भाइरस संक्रमणका कारण ६८ जनाको मृत्यु भएको छ । यो सँगै नेपालमा कोरोना भाइरसको संक्रमणका कारण ज्यान गुमाउनेको संख्या ७ हजार ७९९ जना पुगेको छ ।

नेपालमा पछिल्लो २४ घण्टामा थप ५ हजार ४२ जनामा कोरोना भाइरसको संक्रमण पुष्टि भएको छ । बितेको २४ घण्टामा देशभर ११ हजार ४७१ जनाको आरटी–पीसीआर र ५ हजार ३४३ जनाको एन्टिजेन परीक्षणबाट ५ हजार ४२ जनामा संक्रमण पुष्टि भएको हो । यो सँगै नेपालमा कोरोना भाइरसबाट संक्रमित हुनेको संख्या ५ लाख ८५ हजार १०० जना पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ८ हजार २४३ जना संक्रमित निको भएका छन् । यो सँगै नेपालमा कोरोना भाइरसको संक्रमणमुक्त हुनेको संख्या ४ लाख ८४ हजार ३७३ जना पुगेको छ । यो कुल संक्रमितको ८२.८ प्रतिशत हो ।

हाल देशभर सक्रिय संक्रमितको संख्या ९२ हजार ९२८ जना छ । मन्त्रालयका अनुसार हालसम्म नेपालमा ३१ लाख ३२ हजार ५९१ जनाको आरटी–पीसीआर विधिबाट स्वाब परीक्षण गरिएको छ भने अहिले ९२ हजार ९२८ जना आइसोलेसन र ७३० जना क्वारेन्टिनमा छन् ।