गुल्मीमा १ सय ४० बेडको आइसोलेसन तयार

काठमाडौं, वैशाख २६ –  गुल्मीका विभिन्न स्थानमा हालसम्म १ सय ४० बेडको आइसोलेसन तयार गरिएको छ । उक्त आइसोलेसनहरु संचालन समेत गरिएको प्रशासन कार्यालय गुल्मीले जनाएको छ ।सदरमुकाम तम्घासमा रहेको गुल्मी अस्पतालमा ५ बेडको आइसोलेसन तयार गरिएको छ । तस्तै रेसुङ्गा नगरपालिकाले २० बेड, मुसिकोट नगरपालिकाले १५ बेड, मालिका गाउँपालिकाले ५ बेडको आइसोलेसन तयार गरेको छ ।

मदाने गाउँपालिकाले १० बेड, धुर्कोट गाउँपालिकाले ५ बेड, कालीगण्डकी गाउँपालिकाले १० बेड, चन्द्रकोट गाउँपालिकाले १९ बेड, सत्यवती गाउँपालिकाले ११ बेड, रुरु क्षेत्र गाउँपालिकाले ९ बेड, छत्रकोट गाउँपालिकाले ६ बेड, इस्मा गाउँपालिकाले २० बेड, र गुल्मीदरबारले ५ बेड आइसोलेशन बेड तयार गरेको छ ।अहिले जिल्लामा रहेका दुई नगरपालिका र दश गाउँपालिकाले पनि दोस्रो चरणको कोरोना भाइरस नियन्त्रण गर्नका लागि छुट्टाछुट्टै सक्रियता देखाएका छन् । स्थानीय तहले तयार पारेका आइसोलेसनमा अक्सिजन पनि खरिद गरिएको छ ।

यता नेपाली कांग्रेस गुल्मीले जिल्लास्थित पार्टी कार्यालयलाई कोरोना उपचार तथा आइसोलेसन कक्षका लागि उपलब्ध गराउने भएको छ ।पार्टीका जिल्ला सभापति भुवनप्रसाद श्रेष्ठले सदरमुकाम तम्घास रहेको पार्टी कार्यालय वीपी स्मृति भवनलाई आवश्यकताअनुसार आइसोलेसनका रुपमा प्रयोग गर्न सकिने प्रतिबद्धता व्यक्त गरे ।

जिल्ला कोभिड–१९ संकट व्यवस्थापन केन्द्रको बैठक उहाँले जिल्लाभर फैलिएको कोरोना प्रकोपको भयावह अवस्थालाई दृष्टिगत गरी नेपाली कांग्रेस गुल्मीले समाजप्रतिको सामाजिक उत्तरदाहित्वलाई वहन गर्दै पार्टी कार्यालयलाई कोरोना उपचार तथा आइसोलेसन कक्षका लागि उपलब्ध गराउने बताएका थिए ।

‘हामी सबैको यो पार्टी कार्यालय जनताको सेवामा समर्पित गर्दै कोरोना उपचार तथा आइसोलेसन कक्षका लागि उपलब्ध गराउने,’ उनले भने । त्यस्तै सम्बन्धित पक्षलाई सम्पुर्ण आवस्यक व्यवस्था मिलाउन पनि उनले अनुरोध गरेका छन् ।