तीन वर्षदेखि पार्टीमा लागेकाे खिया हटाइरहेका छाैँ : माधव नेपाल

काठमाण्डाै, चैत ७ – नेपाल कम्युनिष्ट पार्टी एमालेका वरिष्ठ नेता माधव कुमार नेपालले पार्टीमा तीन वर्षदेखि लागेको खिया हटाउने प्रयास आफूहरुले गरेको बताउनुभएको छ ।

नेपाल कम्युनिष्ट पार्टी एमाले नेपाल-खनाल पक्षको युवा संघको राष्ट्रिय कार्यकर्ता भेलालाई शनिबार काठमाण्डौमा सम्बोधन गर्दै नेता नेपालले तीन वर्षदेखि पार्टीमा खिया लागेको र आफूहरुले खिया फाल्ने प्रयास गरिरहेको बताउनुभएको हो ।

पूर्ववत् रुपमा रहेका पार्टीका सबै संरचनाहरुको बैठक, भेला लगायत कार्य गर्दै कार्यकर्तामा फेरि उही उत्साह र एकता भर्ने गरि विचारलाई सफा बनाउने काम भइरहेको उहाँले स्पष्ट पार्नुभयो ।

उहाँले भन्नुभयो – “तीन बर्षसम्म सबै तिर काई लागेको थियो, खिया लागेको थियाे, हामी विस्तारै हटाउँदैछौँ । गन्हाएको थियो मुख । अब फेरि ब्रसिङ गरेर दाँतले हामी फ्रेस एअर दिनेछौँ । सफा र स्वच्छ वायुको साथसाथ प्राणवायु अनि फ्रेस अक्सिजन भरिन्छ  ।”

यसरी दाँत सफा गरेर आएकाे वायुलाई उहाँले माक्सवादको विचार भन्नुभएकाे छ । जसरी शरिरमा अक्सिजन चाहिन्छ त्यसैगरी संगठनमा विचार चाहिने भन्दै उहाँले  त्यो विचारले उर्जा र शक्ति दिएर अघि बढ्नलाई प्रेरित गर्ने बताउनुभयो । ​

यस्तै उहाँले पार्टी एकीकरणपछि एकता अगाडिकै अवस्थामा फर्कनु भनेर सर्वाेच्च अदालतले फैसला गर्नु भनेको “जन्मेको बच्चा मान्दैनौ फेरि गर्भमा लैजाउ” भने जस्तै भएको टिप्पणी पनि गर्नुभयो । फैसला गलत भए पनि सर्वोच्च अदालतको फैसला भएकाले असहमती भएर पनि मान्दैनौ भन्न नमिल्ने अवस्था भएकाे उहाँकाे भनाइ छ । 

पार्टीमा सबैभन्दा ठूलो समस्याको जड नै अध्यक्ष केपी ओली भएको भन्दै उहाँले सर्वोच्च अदालतको फैसलापछि पूर्ववत् संरचनालाई नै अस्तित्वमा ल्याउँ भन्ने आफूहरुको प्रस्ताव ओलीले नमानेको दाबी पनि गर्नुभयो ।

आफूहरुले केपी ओलीमा जाने नभएर पूर्व एमालेमा प्रधानमन्त्री केपी ओली पनि आउनुपर्ने र आफू पनि त्यही ठाउँमा पुग्न पर्नेमा उहाँले जाेड दिनुभयाे ।

यस्तै देशभर पार्टीका सबै संगठनको राष्ट्रिय भेला गरिने भन्दै उहाँले किसान संघ, पीडित समुदाय लगायतको राष्ट्रिय भेला गरि पुर्नजीवन र पुर्नताजगी दिने बताउनुभयो । उहाँले लोकतन्त्रको पक्ष र प्रतिगमनकारी विरुद्धको आन्दोलनमा आफूहरु एकताबद्ध भएर अघि बढ्ने बताउनुभयो । पार्टीको सुदृढिकरण र विस्तारका लागि धेरै भन्दा धेरै युवालाई संगठनमा आवद्ध गर्न पनि उहाँले कार्यकर्तालाई निर्देशन दिनुभयो ।