निषेधाज्ञामा आन्तरिक र अन्तर्राष्ट्रिय हवाई उडान नरोकिने

काठमाडौं, वैशाख १६ । निषेधाज्ञामा आन्तरिक र अन्तर्राष्ट्रिय हवाई उडान नरोकिने भएको छ । यद्यपी, झण्डै दुई साता चल्ने निषेधाज्ञामा स्थलमार्ग हुँदै चल्ने सार्वजनिक यातायातहरु सञ्चालन हुने छैनन् ।

नेपाल नागरिक उड्डयन प्राधिकरण (क्यान) ले निषेधाज्ञाको समयमा आन्तरिक र अन्र्ताष्ट्रिय दुवैतर्फको उडान हुने बताएको छ । प्रवक्ता राजकुमार क्षेत्रीले विहीबारदेखि लागु हुने निषेधाज्ञामा आन्तरिक र अन्तर्राष्ट्रिय उडान नियमित सञ्चालन गरिने बताए ।

हवाई उडानका लागि विमान स्थलसम्म जाने हवाई यात्रु र विमानका कर्मचारीको सहज आवागमनका लागि संस्कृती, पर्यटन तथा नागरिक उड्डयन मन्त्रालयले आवश्यक सहकार्य गर्ने बताइएको छ । त्यसका लागि क्यानले मन्त्रालयलाई सहजीकरण गरिदिन पत्राचार समेत गरेको छ ।