निषेधाज्ञा थप खुकुलोः आजदेखि निजी सवारीमा जोर-बिजोर प्रणाली लागू, पसलहरू बार अनुसार खुल्ने

काठमाडौं । सरकारले काठमाडौं उपत्यकाको निषेधाज्ञालाई थप खुकुलो बनाउँदै एक साता समय थपेपनि निजी सवारी साधन सञ्चालनका लागि जोर विजोर प्रणाली लागु गरेर सञ्चालनमा अनुमति दिएको छ ।

निजी गाडीमा यात्रा गर्दा बढीमा ४ जनालाई अनुमति दिइने, मोटरसाइकलमा दुई जनाले यात्रा गर्न सक्ने र ट्याक्सीलाई पनि जोर बिजोर अनुसार चल्न दिइने भएको छ ।
यस्तै आइतबार, मंगलबार र बिहीबार ११ देखि ४ बजेसम्म सुन, भाँडाकुडा, अटो मोबाइल्स, विद्युतीय सामग्री खोल्न दिइने भएको छ । सोमबार, बुधबार र शुक्रबार ११ बजेदेखि ४ बजेसम्म सपिङ मल, कपडा, जुत्ता, साडी, कस्मेटिक्स, फेन्सी टेलरिङ पसल खोल्न दिइनेछ ।

खाद्यान्न, दूध, किताब पसललगायतका पसलहरू बिहान ११ बजेसम्ममात्र खोल्न दिइनेछ भने रेष्टुरेन्ट, होटलहरूले भने टेक अवे र होम डेलिभरी गर्न पाउने भएका छन् । हार्डवेयर पसलहरु दैनिक ११ बजेदेखि बेलुका ६ बजेसम्म खुल्न पाउने भएका छन् । शनिबार अत्यावश्यक बाहेकका पसलहरु खुल्न नपाउने भएका छन् । सरकारी र सार्वजनिक संस्थानका कार्यालयमा सीमित कर्मचारी राखेर मात्र संचालन गर्न अनुमति दिइएको छ ।