नेपालमा एक सातामै ४० प्रतिशतले बढ्यो संक्रमण

काठमाडौँ, १८ चैत – नेपालमा कोरोना भाइरसको दोस्रो चरणको लहर आउने सम्भावना देखिएको छ ।पछिल्लो एक सातामा कोरोना भाइरसका नयाँ संक्रमित हुनेहरुको संख्या ४० प्रतिशतले वृद्धि भएको छ ।

स्वास्थ्य तथा जनसंख्या मन्त्रालयले छिमेकी राष्ट्रमा कोरोना संक्रमण वृद्धि हुँदा त्यसको असर नेपालमा परेको जनाइएको छ । इपिडिमियोलोजी तथा रोग नियन्त्रण महाशाखाका चिकित्सक डा. बिराज कर्माचार्यका अनुसार पछिल्लो तीन चार दिनदेखिको ट्रेन्डले कोरोना भाइरसको संक्रमण बढ्दै गएको र यसले दोस्रो लहर आउने हो की भन्ने सम्भावना बढेको छ ।

दोस्रो लहरको संकेत

गत सोमबारदेखि बुधबारसम्म दश हजार १८१ जनाको आरटीपीसीआर परीक्षण गरिएकोमा ४७० मा संक्रमण पुष्टि भएको छ । पछिल्लो २४ घण्टामा मात्रै तीन हजार ९१९ जनाको परीक्षण गरिएकोमा १६२ जनामा संक्रमण पुष्टि भएको छ ।

भारतमा कोरोना संक्रमण वृद्धि भएको एक महिनापछि मात्रै नेपालमा संक्रमण बढेको ‘ट्रेन्ड’ देखिएको छ । भारतमा फागुन अन्त्यमा २४ घण्टामा थपिने संक्रमित १२ हजारमा सीमित भएको थियो । तर एक महिना नबित्दै दैनिक रुपमा थपिने संक्रमित करिव ६० हजार पुगेको छ ।

भारतमा तीन साताको तुलना गर्दा संक्रमण वृद्धि दर पाँच सय प्रतिशतले बढेको देखिन्छ । डा. कर्माचार्यले अन्य छिमेकी राष्ट्रको अपेक्षा भारतमा देखिने संक्रमण नेपालसँग सम्बन्धित रहेको बताउनुहुन्छ । उहाँका अनुसार भारतमा संक्रमण बढेको एक महिनापछि नेपालमा संक्रमण बढेको ‘ट्रेन्ड’ देखिएको छ ।

चैत महिना यता कोरोना संक्रमितको संख्या बृद्धि भएको छ । नेपालमा फागुन अन्त्यमा दैनिक संक्रमित थपिने संख्या ४८ सम्म पुगेको थियो । दैनिक थपिने संक्रमित हाल १५० भन्दा माथि पुगेको छ । फागुन १९ गते ७६६ जनामा कोरोनाभाइरसको संक्रमण सक्रिय रहेकोमा बिस्तारै बढ्ने क्रममा एक महिनापछि उक्त संख्या दोब्बर भएको छ ।

हाल एक हजार ४९३ जनामा भाइरसको संक्रमण सक्रिय छ । पछिल्लो एक सातामा मात्रै भारतमा ५९ प्रतिशतले संक्रमण वृद्धि भएको छ ।

नेपाल र भारतमा मात्रै नभई दक्षिण एशियामै पनि कोरोना भाइरसको संक्रमण तीब्र रुपले बृद्धि भएको छ ।

–गोरखापत्र दैनिक