बैंकको नियमित सेवा २-३ घण्टा मात्र, मोबाइल बैंकिङमा जोड

काठमाडौं, चैत १३ -कोरोना भाइरसको सक्रमणको जोखिमलाई मध्यनजर गर्दै बैंकका शाखाहरुले बैंक खुल्ने समय छोट्याएका छन् ।

बैंकहरुले एटीएम र अनलाइन सेवामा जोड दिएका छन् भने नियमित काउन्टर खुल्ने समय भने छोट्याएका छन्।

सरकारले लकडाउन घोषणा गरेपछि बैंकहरुले पनि सजगकता अपनाउँदै कम समय खोल्ने र डिजिटल बैकिङको प्रयोग गर्न आह्वान गरिरहेका हुन् ।

नेपालको सबैभन्दा पुरानो सरकारी स्वामित्वको बैंक नेपाल बैंकले बिहिबारदेखि २ घन्टा मात्रै बैंक शाखा खोल्ने भएको छ। ११ बजेदेखि १ बजेसम्म मात्र सिमित शाखा खोल्ने भएको हो। बुधबार बैंक साढे तीन घन्टा खोलेको थियो। बुधबार विहान १० बजेदेखि १:३० बजेसम्म जिल्लामा कम्तीमा एउटा शाखा खोलेको थियो।

सरकारकै स्वामित्व अर्को बैंक कृषि विकास बैंकले भने १०:३० बजेदेखि १:३० बजेसम्म कोटेश्वर, लठ्ठाघर, लगनखेल, महाराजगन्ज, बालाजु, नयाँ बानेश्वर, दुधपाटी, मंगलबजार, कालीमाटी, चावाहिल, सल्लाघारी र पुल्चोक शाखा खोल्ने भएको छ। धेरैजसो बैंकहरुले भने बैंक खोल्न नसकिने एटिएम, मोबाइल बैंकिङलाई प्रोत्साहन दिने बताउँदै आएका छन्।

बैंकका कर्मचारीले पनि आफ्ना ग्राहकलाई बैंकमा आउनुको सट्टा एटिएम, मोबाइल बैकिङ, इन्टरनेट बैकिङलगायतका डिजीटल बैकिङ सेवाहरु प्रयोग गर्न आग्रह गरेका छन्।