महासंघकी अध्यक्ष राणाद्वारा मन्त्रीलाई मास्क तथा व्यक्तिगत सुरक्षा उपकरण हस्तान्तरण

काठमाडौं, चैत ६ – नेपाल उद्योग वाणिज्य महासंघकी अध्यक्ष भवानी राणाले उद्योग, वाणिज्य तथा आपूर्तिमन्त्री लेखराज भट्टलाई मास्क तथा व्यक्तिगत सुरक्षा उपकरण हस्तान्तरण गरेकी छन् ।

अध्यक्ष राणाले महासंघका तर्फबाट दश हजार थान मास्क र २ सय पचास सेट व्यक्तिगत सुरक्षा उपकरण हस्तान्तरण गरेकी हुन् । व्यक्तिगत स्वास्थ्य सुरक्षा उपकरण हस्तान्तरण गर्दै अध्यक्ष राणाले महासंघले सदाझै संस्थागत सामाजिक उत्तरदायित्वलाई मनन गरी अहिलेको जटिल परिस्थितिमा जनताको स्वास्थ्य सुरक्षाका लागि सरकारले अगाडि बढाएका कार्यक्रममा सहयोग पुगोस भन्ने उद्देश्यले सहयोग कार्यलाई थालनी गरेको र यसलाई निरन्तरता दिंदै जाने प्रतिवद्धता सो अवसरमा जनाइन् ।

सो अवसरमा उद्योग, वाणिज्य तथा आपूर्ति राज्यमन्त्री मोतीलाल दुगड, उद्योग मन्त्रालयका सचिव चन्द्रकुमार घिमिरे, वाणिज्य मन्त्रालयका सचिव डा। बैकुण्ठ अर्याल, महासंघका उपाध्यक्ष किशोरकुमार प्रधान, मन्त्रालयका सहसचिवहरू, नेपाल उद्योग वाणिज्य महासंघको प्रदेश नम्वर ३ का अध्यक्ष दिनेश श्रेष्ठ, महासंघका उपमहानिर्देशक हंसराम पाण्डे, उपनिर्देशक विदुरचन्द्र लामिछाने सहितको उपस्थिति थियो ।