लगातार वर्षाका कारण ठाउँठाउँमा पहिरो, पृथ्वी राजमार्ग अवरुद्ध

श्रावण ५ — लगातारको वर्षाले ठाउँठाउँमा पहिरो जाँदा पृथ्वी राजमार्ग अवरुद्ध बनेको छ । धादिङको गल्छि, गजुरी र बेनीघाट रोराङ गाउँपालिकाका विभिन्न ठाउँमा राजमार्ग माथिबाट पहिरो खसकाले सडक अवरुद्ध भएको हो । धादिङका प्रहरी प्रमुख एसपी रवीन्द्र रेग्मीका अनुसार दर्जनभन्दा बढी ठाउँमा पहिरो गएको छ ।

ठाउँठाउँमा गएको पहिरोले सवारीसाधन रोकिएका छन् । राजमार्गको माथिल्लो भागतिर खनिएको ग्रामीण सडकबाट आएको लेदोले पनि राजमार्ग अवरुद्ध भएको छ ।

यस्तै जवाङ खोलामा आएको बाढीले ६ वटा गाडी बगाएको छ भने ४ वटा पुरेको छ । एसपी रेग्मीका अनुसार राजमार्ग अवरुद्ध भएकोले प्रहरी पनि घटनास्थलमा पुग्न सकेको छैन । उनका अनुसार गजुरीमा पनि १७ वर्षीया युवती बेपत्ता भएकी छन् ।