लुम्बिनी क्षेत्रको बढदो प्रदूषण घटाउन विद्युतीय सवारी साधनको प्रयोग हुने

काठमाण्डौँ — विश्व सम्पदामा सूचीकृत लुम्बिनी क्षेत्रको बढदो प्रदूषण घटाउन विद्युतीय सवारी साधनको प्रयोग हुने भएका छन् ।

एक महिनाअघि चिनियाँ कम्पनीले दुईवटा विद्युतीय बस भैरहवा भन्सार कार्यालयमा ल्याइपुर्‍याएको छ ।

बाँकी आउने क्रममा छन् ।

एसियाली विकास बैंक (एडीबी) को करिब ३० करोड रुपैयाँ अनुदानमा सोलार प्रविधिबाट चार्ज हुने पाँचवटा ठूला बस, ११ जिप भ्यान सञ्चालन गरिने भएको हो ।
गौतम बुद्ध अन्तर्राष्ट्रिय विमानस्थलको निर्माण पूरा हुनासाथ पर्यटकका लागि प्रदूषणरहित विद्युतीय बस र भ्यान सञ्चालनको व्यवस्था गरिएको लुम्बिनी विकास कोषले जनाएको छ ।

त्यहाँको विमानस्थल हुँदै लुम्बिनी आउने स्वदेशी तथा विदेशी पाहुनाको लुम्बिनी भ्रमणका लागि यस्ता सवारीका साधन उपयोग गर्ने कोषका योजना प्रमुख तथा कार्यवाहक सदस्यसचिव सरोज भट्टराईले बताए ।