शुक्रबार थपिए ३,७५० जनामा कोरोना संक्रमित, ५,२२५ जना डिस्चार्ज हुँदा ६७ जनाको मृत्यु

काठमाडौं, जेठ २८ – नेपालमा पछिल्लो २४ घण्टामा थप ३ हजार ७५० जनामा कोरोना भाइरसको संक्रमण पुष्टि भएको छ । बितेको २४ घण्टामा देशभर ९ हजार ५९८ जनाको आरटी–पीसीआर गर्दा २,७०९ जना र ५ हजार ५८४ जनाको एन्टिजेन परीक्षण गर्दा १ हजार ४१ जना गरी आज ३ हजार ७५० जनामा संक्रमण पुष्टि भएको हो ।

यो सँगै नेपालमा कोरोना भाइरसबाट संक्रमित हुनेको संख्या ६ लाख ४ हजार ३९६ जना पुगेको छ ।

नेपालमा पछिल्लो २४ घण्टामा कोरोना भाइरस संक्रमणका कारण ६७ जनाको मृत्यु भएको छ । यो सँगै नेपालमा कोरोना भाइरसको संक्रमणका कारण ज्यान गुमाउनेको संख्या ८ हजार ३०५ जना पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ५ हजार २२५ जना संक्रमित निको भएका छन् । यो सँगै नेपालमा कोरोना भाइरसको संक्रमणमुक्त हुनेको संख्या ५ लाख २० हजार ८१६ जना पुगेको छ । यो कुल संक्रमितको ८६.२ प्रतिशत हो ।

हाल देशभर सक्रिय संक्रमितको संख्या ७५ हजार २७५ जना छ । मन्त्रालयका अनुसार हालसम्म नेपालमा ३१ लाख ९८ हजार ७०२ जनाको स्वाब (नमूना) परीक्षण गरिएको छ भने अहिले ७५ हजार २७५ जना आइसोलेसन र ५९४ जना क्वारेन्टिनमा छन् ।