सानिमा बैंकको डिजिटल काउण्टर संचालनमा, क्यूआर कोड स्क्यान गरी पैसा निकाल्न सकिने

काठमाडौं, साउन १४ – सानिमा बैंकले ग्राहकहरुको सुविधालाई ध्यानमा राख्दै नयाँ प्रविधियुक्त बैङ्किङ सेवाहरु संचालन गर्दै आइरहेको छ । सोही क्रममा बैंकले यही साउन १३ गतेदेखि डिजिटल काउण्टर संचालनमा ल्याएको छ ।

अब डिजिटल काउण्टरमार्फत सानिमा बैंकका ग्राहकहरुले चेक बिना नै भुक्तानी प्राप्त गर्न सक्नेछन् । यो सेवा प्रयोग गर्न मोबाइल बैङ्किङ एप “सानिमा सजिलो ई बैंकिङ्ग”बाट नक्साल शाखामा रहेको डिजिटल काउण्टरमा गएर क्यूआर कोड स्क्यान गरी भुक्तानी प्राप्त गर्न सकिन्छ ।

ग्राहकले चेकबुक भर्नुपर्ने प्रक्रिया बिना सिधै डिजिटल काउण्टरमा रहेको क्युआर कोड स्क्यान गरी रकम निकाल्न सकिने हुनाले यो सेवा छिटो, छरितो र सरल रहेको छ ।

यो सेवाहाल सानिमा बैंकको प्रधान कार्यालय नक्सालबाट सुरु गरिएको र समय अनुसार यो सेवामा थप सुविधाहरु समायोजन गरी विस्तार गरिने बैंकले जनाएको छ ।