अभिनेत्री नीता ढुंगाना निर्देशक बन्दै

काठमाडौँ, भदौ २९ – अभिनेत्री नीता ढुंगानाको आज जन्मदिन परेको छ । हरेक वर्ष साथीभाइ भेला गरेर जन्मदिनको खुसी साट्टै आएकी उनले यस पटक कोरोनाको कहरका कारण जन्मदिन घरमै मनाउँदैछिन् । उनलाई जन्मदिनको शुभकामना सामाजिक संजाललगायत विभिन्न माध्यबाट मिलिरहेको छ ।

बाल कलाकारबाट अभिनयमा प्रवेश गरेकी नीताको चलचित्र अभिनयमा बेग्लै पहिचान छ । उनी निर्माता निर्देशकको रोजाइमा हिरोइन पनि हुन् । चलचित्रको अलवा म्युजिक भिडियोको पनि उनी रोजाइकी मोडल हुन् । सिम्पल, सोझी र मिलनसार अभिनेत्रीको रुपमा समेत परिचित नीता अहिले गायिकाको रुपमा पनि अगाडि आएकी छन् । उनको स्वर रहेको ‘गणेश भजन’ गीत केही अगाडि मात्र सार्वजनिक भएको थियो ।

अघिल्लो बर्ष आफ्नै जन्मदिनको अवसर पारेर एक फिल्म प्रोडक्सन हाउस घोषणा गर्दै फिल्म निर्माणको समेत जानकारी दिएकी नीताले कोरोनाको कहरका कारण फिल्म निर्माण केही समय थाती राखेकी छन् । नीता अहिले एक वेव सिरिज निर्माणमा जुटेकी छन् । जन्मदिनको अवसर पारेर उनले ‘श्रीमद्धभागवत गीता’ निर्माण गर्न लागेको जानकारी दिइन् । उनकै निर्माण निर्देशन रहने सिरिजमा रामजी लामिछानेको कोरियोग्राफी, बनिष शाहको सम्पादन र संजय लामाको छायाँकन रहनेछ ।