आसाममा ग्यास लिक, ७०० बढीलाई सुरक्षित स्थानमा सारियो

काठमाडौं । भारतको आसामको तेल तथा प्राकृतिक ग्यास निगमको तेल तथा ग्यास रिगमा भएको लिकेजपछि ७०० भन्दा बढी मानिसहरूलाई सुरक्षित स्थानमा सारिएको छ ।

यो घटना आसामको शिवसागर जिल्लाको भोटियापार क्षेत्रमा भएको मिडिया रिपोर्टमा उल्लेख छ । त्यहाँ गत बिहिबार मध्याह्न १२ बजेतिर सर्भिसिङ सञ्चालनका क्रममा आरडीएस–१४७ नम्बरको इनारबाट ठूलो मात्रामा ग्यास चुहावट हुन थालेको थियो ।

घटनापछि जिल्ला प्रशासनले नागरिकहरूको सुरक्षाका लागि एक किलोमिटरको दायरा घेराबन्दी गरेको छ । जानकारीअनुसार उक्त ग्यास चुहावटको घटनामा ७०० भन्दा बढी मानिसहरू प्रभावित भएका छन् । इनारबाट हुने ग्यास चुहावट अझै नियन्त्रणमा आएको छैन । घटनापछि सो क्षेत्रका मानिसहरूमा डरको वातावरण सिर्जना भएको छ ।

ओएनजीसीले भनेको छ, ‘सुरक्षाको कारणले गर्दा केही परिवारहरूलाई घटनास्थलबाट सुरक्षित स्थानहरूमा खोलिएका राहत शिविरहरूमा सारिएको छ । देशको उत्कृष्ट सङ्कट व्यवस्थापन टोली इनार नियन्त्रण गर्न र स्थितिलाई सामान्य बनाउन काम गरिरहेको छ । देशका विभिन्न भागहरूबाट केही ओएनजीसी विज्ञहरू आएका छन् । हामी आशावादी छौँ कि स्थिति सकेसम्म चाँडो सुधार हुनेछ ।’

ओएनजीसीबाट प्राप्त जानकारी अनुसार इनार नम्बर आरडीएस १४७ रुद्रसागर तेल क्षेत्रको रिग नम्बर एसकेपी १३५ मा अवस्थित छ । रिग ब्रह्मपुत्रको सहायक नदी दिखो नदीको किनार नजिकै अवस्थित छ । रुद्रसागर तेल क्षेत्र देशको सबैभन्दा पुरानो तेल क्षेत्रहरूमध्ये एक हो, जहाँ ओएनजीसीले १९६० मा उत्पादन सुरू गरेको थियो ।