इजरायलका लागि नेपाली राजदूत डा. अन्जान शाक्य ‘डिप्लोम्याट अफ दी इयर २०२०’

काठमाडौं, मंसिर २९ – इजरायलका लागि नेपाली राजदूत डा. अन्जान शाक्य डिप्लोम्याट आफ दी इयर २०२० अवार्डबाट सम्मानित हुनुभएको छ। एम्बेस्डरर्स क्लब अफ इजरायलले एक कार्यक्रमको आयोजना गरी शाक्यलाई सम्मान गरेको हो । अवार्ड केही महिना अघि नै घोषणा गरिएको भएपनि कोरोना महामारीका कारण वितरण भने गरिएको थिएन । ईजरायली संस्था एम्बेस्डरर्स क्लब अफ इजरायल का अध्यक्ष इज्याक यल्डान र ईजरायली परराष्ट्र मन्त्रालयको शिष्टाचार विभाग प्रमुख गिल हस्केलले संयुक्त रुपमा राजदूत डा. शाक्यलाई अवार्ड प्रदान गर्नुभएको थियो । आफ्नो जुझारुपनका कारण राजदूत डा. शाक्यले ईजरायल आएको छोटो समयमै नेपाललाई ईजरायलमा राम्रो बनाउन सफल भएकोले वर्ष राजदूत अवार्डबाट सम्मानित गरिएको संस्थाले जनाएको छ।

अवार्ड वितरण कार्यक्रममा ईजरायली परराष्ट्र मन्त्रालयको शिष्टाचार विभाग प्रमुख गिल हस्केल, मन्त्रालयकै एशिया प्रशान्त डिभिजनका उपप्रमुख राजदूत माइकल रोनेन, ईजरायलका लागि म्यानमारका राजदूत एच. ई. माउंग माउंग लिन, क्लबका उपाध्यक्ष, निर्देशकहरूको बोर्ड, सीईओ लगायतका व्यक्तित्वहरुको उपस्थिति रहेको थियो।