एनआईसी एशिया बैंकको सीईओमा राेशनकुमार न्यौपाने नियुक्त

काठमाडौं – एनआईसी एशिया बैंक लिमिटेडको प्रमुख कार्यकारी अधिकृत‍ ‌(सीईओ)मा रोशनकुमार न्यौपाने नियुक्त भएका छन् ।

बैंकको ३७९औं सञ्चालक समितिको बैठकले बैंकका कायम मुकायम प्रमुख कार्यकारी अधिकृत न्यौपानेलाई सीईओ पदमा नियुक्त गरेको हो ।

उनको कार्यकाल ४ वर्षको लागि तोकिएको छ ।

तत्कालिन प्रमुख कार्यकारी अधिकृत लक्ष्मण रिसालको राजिनामा स्वीकृत भएपश्चात नवनियुक्त सीईओ न्यौपानेले कायम मूकायम प्रमुख कार्यकारी अधिकृतको रुपमा बैंकको नेतृत्व सम्हाल्दै आएका थिए ।

नवनियुक्त सीईओ न्यौपाने आन्तरिक लेखापरीक्षण विभाग प्रमुखको रुपमा तत्कालीन बैंक अफ एशिया नेपाल लिमिटेडबाट बैंकिङ्ग क्षेत्रमा प्रवेश गरेका थिए । उनी चार्टड एकाउण्टेण्ट समेत हुन् ।