कोकाकोला र डोको रिसाइकलर्सले काठमाडौँमा ‘पिइटी कलेक्सन बिन’ राख्दै

काठमाडौं, चैत ६ –  विश्व रिसाइक्लिङ दिवसको अवसरमा कोकाकोला र डोको रिसाइकलर्सले काठमाडौँमा १० सूचनामूलक पीईटी कलेक्सन बिन स्थापना गर्ने घोषणा गरेको छ।

‘रिफ्रेस एन्ड रिसाइकल’ अभियान अन्तर्गत प्रयोग भइसकेका बोतलहरू संकलन गर्ने उद्देश्यसहित बिन राखिएको बताइएको छ। यो अभियानले समुदायलाई प्रयोग भइसकेका बोतलहरूलाई प्रशोधन गरेपछि पुनः प्रयोगका लागि योग्य हुन्छन् भन्नेबारे जागरुकता जगाउनुका साथै चेतना फैलाउने काम गरिने बताइएको छ।

यसअघि प्रयोग भएका बोतलहरू राख्नका लागि स्वयम्भूनाथ स्तूपा, बौद्ध स्तूप, पाटन अस्पताल, पाटन ढोका, पाटनदरबार स्क्वायर, त्रिभुवन विश्वविद्यालय र ललितपुर महानगरपालिका सार्वजनिक पार्कहरुमा राखिने बताइएको छ। यी क्षेत्रमा प्रयोग भइसकेका बोतलहरू प्रायः डिस्पोज गर्ने गरिएको छ।

त्रिभुवन विश्वविद्यालयका प्रोक्टर अबिलाल शाहले भने,’त्रिभुवन विश्वविद्यालयमा राखिएको बिनमा विद्यार्थी, प्राध्यापक र प्रशासनिक कर्मचारीले सकारात्मक प्रतिक्रिया दिए। त्रिभुवन विश्वविद्यालयमा राखिएको डिब्बा प्रायः सबैले प्रयोग गर्न भएकाले दुवै विद्यार्थी र आगन्तुकहरुका लागि यो उपयोगी भएको छ। हामी भविष्यमा अन्य सहयोगहरुका लागि समेत तत्पर छौं,’ उनले भने।

उपभोक्ताले डिस्पोजल गर्नुभन्दा अगाडि बोतल खाली र सफा छन् वा छैनन्, कुल्चिएको छ वा छैन भनी सुनिश्चित गरिने बताइएको छ। सार्वजनिक जागरुकताका लागि डिस्पोजलको उचित चरण र प्रयोग भइसकेका बोतलहरुको रिसाइकल प्रक्रियाका बारेमा बोतल संकलन गर्न राखिएका बिनमा विभिन्न जानकारीसमेत लेखिएको आयोजकले जनाएको छ। प्रयोग भइसकेका बोतलहरू पछि अन्य कामका लागि उपयोग गर्न सकिने भएकाले यसलाई फोहोरको रुपमा वर्गीकरण नगरिएको बताइएको छ। 

‘रिसाइक्लिङका लागि सार्वजनिक पूर्वाधार प्रदान गर्न चाहन्छौं र रिसाइक्लिङ गर्दा हुने फाइदाका बारेमा मानिसलाई शिक्षित पार्न चाहन्छौं,’ डोको रिसाइक्लर्सका सहसंस्थापक राघवेन्द्र महतोले भने। 

बोतलर्स नेपाल लिमिटेडका प्रबन्ध निर्देशक प्रदीप पाण्डेले भने, ‘हामीले पर्यावरण कर्मचारीका रूपमा आफूलाई गम्भीरताका साथ लिएका छौं। जसका लागि हामी नेपालमा फोहोरजन्य वस्तुको पुनःप्रयोगका लागि नयाँ र सुधारिएका उपायहरू अपनाउने छौं।’ 

हरेक साता डोको रिसाइक्लर्सले प्रयोग भइसकेका बोतलहरू संकलन गर्ने र यसलाई पुनः प्रयोग योग्य बनाउनका लागि निश्चित स्थानमा पठाइने बताइएको छ। फोहोरजन्य सामग्रीहरूलाई प्रशोधन गरेर नयाँ बोतल‚ कन्टेनरहरू र विभिन्न कपडा‚ कार्पेट बनाउन सकिन्छ। हालसम्म डोको रिसाइक्लर्सले करिब दुई हजार पीईटी बोतलहरू संकलन गरिसकेको जनाएको छ। 

२०१८ मा कोकाकोलाले २०३० सम्ममा सबै प्रयोग भइसकेका बोतलहरूलाई संकलन गर्दै त्यसलाई पुनःप्रयोगमा ल्याउने उद्देश्यका साथ ‘फोहोरबिनाको विश्व’ अभियानको घोषणा गरेको थियो।