कोभिड–१९ विरुद्धको संघर्ष अभियानमा भक्तपुरका संस्थाहररूको सक्रियता बढ्यो

• केके मानन्धर

भक्तपुर, जेठ १७ – कोभिड–१९ महामारीबाट जोगिन भक्तपुरका व्यावसायिक र सामाजिक संघसंस्थाहरुको सक्रियता बढेको छ । स्वास्थ्य सुरक्षाको मापदण्ड पालना गर्दै भौतिक उपस्थितिलाई न्यूनीकरण गरी सक्रियता बढाएको हो ।

कोभिड संक्रमणको दोस्रो लहर रोकथाम र नियन्त्रणका लागि सिंगो राष्ट्र लागि परेको बखत सामाजिक उत्तरदायित्व बहन गरी भक्तपुरका संस्थाहरुले विभिन्न खाले सेवा उपलब्ध गराएका छन् । भक्तपुर चेम्बर अफ कमर्श तथा भक्तपुर लायन्स सेवा समन्वय समितिको संयोजनमा एघार वटा संस्थाहरुले संयुक्त रुपमा कोभिड–१९ विरुद्ध अभियान नै चलाएका हुन् ।

‘सेवा परमो धर्म अभियान अन्तर्गत कोभिडसँग लड्छौं । हामी सेवा दिन्छौं’ नारा दिएर कोभिडविरुद्धको संघर्षमा लागेको नेपाल चेम्बर अफ कमर्शका केन्द्रीय सदस्य (भौतिक पूर्वाधार सभापति) तथा भक्तपुर लायन्स सेवा समन्वय समितिका सेक्रेटरी रोशन भोयद्योले बताए । विश्वभर फैलिएको कोभिडलाई परास्त गर्ने अभियानमा जोडिन उनले सर्वसाधारणमा अपिल समेत गरेका छन् ।

कोभिड संक्रमितहरुको उपचारमा संलग्न चिकित्सक तथा स्वास्थ्य परिचारिकाहरुका लागि जेठ १७ गतेदेखि विशेष किसिमको क्वारेन्टिन सेन्टर सञ्चालनमा आउने भोयद्योले बताए । त्यस्तै जेठको तेस्रो हप्तादेखि अक्सिजन सिलिन्डर उपलब्ध गराउने तयारी भइरहेको उनको भनाइ छ ।

अभियानले चाँगुनारायण नगरपालिकाद्वारा सञ्चालित कोभिड–१९ आइसोलेसन सेन्टर नेकसँग सहकार्य गरेको छ । संक्रमण नियन्त्रणको सवालमा आइसोलेसन सेन्टरलाई थप प्रभावकारी बनाउन आवश्यक व्यवस्थापन गरिएको भक्तपुर चेम्बर अफ कमर्शका अध्यक्ष तथा भक्तपुर विद्युतीय सामग्री व्यवसायी संघका संस्थापक अध्यक्ष न्हुछेरत्न मानन्धरले बताए । ‘परमो धर्म अभियान’ले जेठको पहिलो हप्तादेखि भक्तपुरमा कोभिड बिरामीका लागि चौबीसै घण्टा निःशुल्क एम्बुलेन्स सेवा सञ्चालनमा ल्याएको छ ।

त्यसका लागि हटलाइन नं. ९८६१७५६४६१ सार्वजनिक गरिएको छ ।

त्यस्तै, भक्तपुर जिल्ला प्याव्सनका वरिष्ठ उपाध्यक्ष तथा चेम्बरका सचिव सुरेन्द्र श्रेष्ठले मनोचिकित्सक डा. कञ्चन दाहाल र वरिष्ठ कार्डियोलोजिष्ट डा. सञ्जय श्रेष्ठसँग भर्चुअल रुपमा अन्तरक्रिया कार्यक्रम सम्पन्न गरेको जानकारी दिएका छन् । सचेतना तथा परामर्श कार्यक्रम नियमित रुपमा प्रत्येक साता दुईवटा आयोजना गरिने उनले बताए ।

सो कार्यक्रममार्फत संक्रमण सम्बन्धिको सचेतना, सतर्कता र अपनाउनुपर्ने सुरक्षाको विषयमा जानकारी लिन सकिने उनको भनाइ छ । चिकित्सकसँग परामर्श लिनका लागि बिहान ७ बजेदेखि ९ बजेसम्म सम्पर्क गर्न सकिने गरी ९७४२८८२९६२, ९७४२८८२९६३ र ९७४२८८२९६४ नम्बरहरू सार्वजनिक गरिएका छन् ।

त्यस्तै, भक्तपुर लायन्स सेवा समन्वय समिति, समितिमा आवद्ध क्लब तथा मनकारी व्यक्तिहरूले भक्तपुर नगरपालिकाले शुरू गर्ने अक्सिजन प्लान्टका लागि तीन लाख रूपैयाँ सहयोग गरेको समितिका संरक्षक तथा पूर्व डिष्ट्रिक्ट गभर्नर कृष्ण प्रसाद अवालले जानकारी दिए । आगामी दिनमा चिकित्सक, स्वास्थ्यकर्मी लगायतको टिमबाट घरघरमै पुगेर पीसीआर परीक्षण, रगत जाँच तथा आवश्यक परामर्श सेवा उपलब्ध हुने लायन्स सेवा समन्वय समितिका अध्यक्ष विष्णुभक्त मारिखुंले बताए । सुरक्षित तबरले उपलब्ध हुने ‘डोर टू डोर हेल्थ सर्भिस’ले भक्तपुरबासी लाभान्वित हुने मारिखुंको भनाइ छ ।

‘म लगायतको १६ जना चिकित्सकीय टीम तयार छौं । थप केहि संख्यामा स्वास्थ्य परिचारिकाहरु पनि सोही टीममा संलग्न हुनेछन् र प्रत्येक दिन दुई जना चिकित्सकबाट निःशुल्क परामर्श उपलब्ध गराउनका लागि सामाजिक सञ्जालमार्फत सम्पर्क नम्बर सार्वजनिक गर्दैछौं,’ भक्तपुर डक्टर्स सोसाइटीका अध्यक्ष डा. पुण्यराम खर्बुजाले भने ।

कोभिडविरुद्धको संयुक्त सेवा अभियानमा भक्तपुर जिल्ला प्याब्सन, भक्तपुर विद्युतीय सामग्री व्यवसायी संघ, भक्तपुर डक्टर्स सोसाइटी, नेपाल नर्सिङ संघ, सीबीआर, भक्तपुर हार्ट एण्ड डायवेटिज सेन्टर, निरोग मेडिकल केयर एट होम, भक्तपुर पार्टी प्यालेस तथा क्याटरिङ संघ र त्रिनेत्र बचत तथा ऋण सहकारी संस्थाहरूले संस्थागत सहकार्य गरेक छन् ।

त्यस्तै नेपाल नर्सिङ संघका केन्द्रीय सदस्य हरिप्रसाद कोजु र लायन्स ३२५ ए २ का रिजन चियर पर्सन रञ्जित मारिखुं यस अभियानमा सक्रिय सहभागी छन् ।

उसो त कोरोना शुरू हुनुअघि नै निजी कम्पनीहरूमा सामाजिक उत्तरदायित्वको चेतना बढेकै थियो । तर, औद्योगिक व्यवसाय ऐन, २०७३ र औद्योगिक व्यवसाय नियमावली, २०७६ लागू भएयता विभिन्न संघसंस्थाले ‘सीएसआर’ कार्यक्रम अन्तर्गत अन्य समयमा भन्दा अहिले तुलनात्मक रुपमा बढी मात्रामा सेवा दिएका छन् । कोरोनाले निम्त्याएको समस्या र चुनौती सामना गर्न सरकार एक्लैको सामथ्र्यमा नागरिक र निजी क्षेत्रले सहकार्य गर्नु स्वागतयोग्य छ ।

स्वास्थ्य संकटको बीचमा विभिन्न संघसंस्थाले जनचेतना फैलाउने, स्वास्थ्य सामग्रीको वितरण, परामर्श सेवा, आपूर्ति तथा अन्य सेवाजन्य कार्यले गर्दा सामुहिक रुपमा कोरोनालाई परास्त गर्नेमा सहयोग मिल्ने छ ।