कोभ्याक्स सुविधा अन्तर्गतको ३ लाख ४८ हजार खोप आज नेपाल ल्याइँदै

काठमाडौँ, २३ फाल्गुन – कोभ्याक्स स‌ंयन्त्रबाट ३ लाख ४८ हजार खोप आज नेपाल ल्याइँदै छ ।

स्वास्थ्य सचिव लक्ष्मण अर्यालका अनुसार खोप बिहान सवा ११ बजे नेपाल आइपुग्नेछ । कोभ्याक्स फ्यासिलिटी अन्तर्गत नेपालले नि:शुल्क रुपमा उक्त खोप पाएको हो।

कोभ्याक्सले नेपालको खोप लगाउने जनसंख्या मध्ये २० प्रतिशतलाई पुग्ने गरी एक करोड ३० लाख डोज खोप उपलब्ध गराउने छ।

कोभ्याक्सले हाल नेपालमा प्रयोगमा ल्याइएको सिरम इन्स्टिच्युट अफ इन्डियाले उत्पादन गरेको ‘कोभिसिल्ड’ खोप नेपाललाई उपलब्ध गराएको छ ।

दक्षिण एसियाली क्षेत्रीय सहयोग सङ्गठन (सार्क)मा कोभ्याक्समार्फत बर्मा, श्रीलङ्का र नेपालले मात्र खोप पाएका छन् । भारतको सेरम इन्स्टिच्युट कम्पनीसँग खरीद गरेको खोप पनि एक हप्ताभित्र आउने सचिव अर्यालले बताए ।

सरकारले आजै दोस्रो चरणको खोप अभियान शुरू गर्दैछ । यो चरणमा १५ हिमाली जिल्लाका ५५ वर्षभन्दा माथि र बाँकी अन्य जिल्लाका ६५ वर्षभन्दा माथिका ज्येष्ठ नागरिकलाई लगाइने बताए ।

करीब ६ हजार खोप केन्द्रबाट प्रत्येक दिन दुई लाखका दरले खोप प्रदान गरिने उनले बताए । उनका अनुसार असार १५ गतेसम्म ५५ वर्षमाथिका ज्येष्ठ नागरिकलाई पहिलो र दोस्रो मात्राको खोप लगाइसक्ने तयारी रहेको छ ।

मन्त्रालयका प्रवक्ता डा. जागेश्वर गौतमले कोरोना भाइरसले आक्रमण नगर्ने भएकाले सबैलाई खोप लगाउन आग्रह गरे ।

यसअघि पहिलो चरणको खोप अभियानअन्तर्गत चार लाख २९ हजारले खोप लगाएका थिए । पहिलो चरण गत माघ १४ देखि फागुन १० गतेसम्म सञ्चालन भएको थियो ।