कोरोना संक्रमणका कारण बारामा गर्भवती महिलाको मृत्यु

काठमाडौं, भदौ ११ – बाराको सुवर्ण गाँउपालिका वडा नम्बर ४ बस्ने एक गर्भवती महिलाको कोरोना भाइरस संक्रमणबाट मृत्यु भएको प्रहरीले जनाएको छ । मृत्यु हुनेमा २३ वर्षीय महिला रहेको बारा प्रहरी प्रवक्ता डिएसपी गौतम मिश्राले जानकारी दिए ।

भदौ ८ गते स्वाब संकलन गरेर नारायणी उपक्षेत्रीय अस्पताल वीरगन्जमा पठाएकोमा १० गते उनमा कोरोना पोजेटिभ रिपोर्ट आएको थियो । नारायणी उपक्षेत्रीय अस्पताल वीरगंजमा भर्ना भएकी उनको उपचारको क्रममा बिहीबार बिहान ६ बजेर ३० मिनेटमा उनको मृत्यु भएको हो ।

स्वासप्रश्वासमा समस्या सृजना हुनुको साथसाथै ज्वरो र पखाला लागेकोमा उपचार हुँदै गर्दा निधन भएको अस्पतालले जनाएको छ । उनको शव व्यवस्थापन गर्ने काम भइरहेको प्रवक्ता मिश्रले जानकारी दिए ।