कोलकाता नाइट राइडर्स प्लेअफमा पुग्ने सम्भावना कति ?

काठमाडौँ, कात्तिक १३ – इन्डियन प्रिमियर लिग (आईपीएल) टी-ट्‍वान्टी क्रिकेटअन्तर्गत आज (बिहीबार) कोलकाता नाइट राइडर्सले चेन्‍नई सुपर किङ्ससँग लिगको १३औं खेल खेल्दै छ ।

दुबई अन्तर्राष्ट्रिय क्रिकेट मैदानमा हुने दुई टोलीबीचको खेल नेपाली समयअनुसार साँझ ७:४५ मा सुरु हुनेछ । आजको खेलमा कोलकातालाई जित्‍नै पर्ने दबाब छ ।

प्लेअफमा आफ्नो सम्भावना जोगाइ राख्‍न आजको खेलमा कोलकातालाई जित्नुपर्ने हुन्छ । कोलकाता लिगमा १२ खेल खेलेर १२ अंकका साथ तालिकाको पाँचौं स्थानमा छ । आजको खेलमा जित निकाल्न सके कोलकाता अंक तालिकाको शीर्ष चारमा उक्लनेछ ।

यता समूह चरणबाटै बाहिरिएको चेन्‍नई आजको खेलमा जित निकाल्दै आफूलाई राम्रो अवस्थामा राख्दै यो सिजनको अन्त्य गर्ने योजनामा छ । चेन्‍नईले अब लिगका दुई खेल खेल्न बाँकी छ । आजको खेलमा जित निकाल्दै चेन्‍नई राम्रो टिम साबित गर्ने योजनामा छ ।