गायिका आस्था राउतलाई पक्राउ गर्न अनुमति

काठमाडौं, माघ ५ – गायिका आस्था राउतलाई पक्राउ गर्न प्रहरीले अनुमति पाएको छ । महिला प्रहरी जवानसँग विमानस्थलमा अभद्र व्यवहार गरेको आरोपमा गायिका आस्था राउतलाई प्रहरीले पक्राउ गर्ने भएको हो ।

अभद्र व्यवहार सम्बन्धी कसुरमा राउतविरुद्ध पक्राउ अनुमति जारी भएको महानगरीय प्रहरी परिसरका प्रवक्ता डिएसपी होविन्द्र बोगटीले जानकारी दिए। राउतलाई जहाजबाट आए विमानस्थलबाट पक्राउ गरिने प्रहरीले जनाएको छ ।

प्रहरीले बुझाएको अनुसन्धान प्रतिवेदनका आधारमा जिल्ला प्रशासन कार्यालय काठमाडौंले राउतलाई पक्राउ गरी कारबाही गर्न अनुमति दिएको हो ।

प्रहरी जवान रमिता श्रेष्ठले आफू ड्यूटीमा रहँदा राउतले गालीगलौज र अभद्र व्यवहार गरेको भन्दै उजुरी दिएकी थिइन् ।

एक कार्यक्रममा भाग लिन जाने क्रममा विमानस्थलमा प्रहरीबाट दुर्व्यवहार भएको भन्दै राउतले भिडियो सन्देश जारी गरेकी थिइन्। भिडियो सन्देशमा उनले प्रहरीमाथि अपशब्द प्रयोग गरेकी थिइन्।