गोरखामा आज देखि निषेधाज्ञा लागू

काठमाडौं, वैशाख २२ –  गोरखामा पनि निषेधाज्ञा लगाइने भएकाे छ । गाेरखामा कोरोना भाइरसको सङ्क्रमण बढ्दै गएपछि यसकाे रोकथाम तथा नियन्त्रणका लागि बुधवार (आज) राति १२ बजेदेखि लागू हुने गरी जिल्लाभर निषेधाज्ञा जारी गरिएकाे हाे । 

जिल्ला कोभिड–१९ सङ्कट व्यवस्थापन केन्द्र डीसीसीएमसी र जिल्ला सुरक्षा समितिको सिफारिसका आधारमा प्रमुख जिल्ला अधिकारी पौडेलले वैशाख महिनाभर लागू हुने गरी गोरखा जिल्लाभर निषेधाज्ञा जारी गर्नुभएको हो । 

जिल्लामा गोरखा र पालुङटार नगरपालिकासहित आरुघाट गाउँपालिकामा मङ्गलवार (हिजाे) रातिदेखि नै निषेधाज्ञा जारी गरिएको थियो । भीमसेन थापा गाउँपालिका ७ र ८ मा पनि यसअघि नै निषेधाज्ञा गरिएको हो । गाेरखामा कोरोनाका सक्रिय सङ्क्रमितको सङ्ख्या एक शय ९६ पुगेको छ ।