चेम्बर अध्यक्ष मल्लद्वारा हलेसीलाई १ किलो चाँदी

काठमाडौं । नेपाल चेम्बर अफ कमर्स अध्यक्ष राजेन्द्र मल्लले हलेसीमा १ किलो चाँदी चढाएका छन् । अध्यक्ष मल्ल र श्रीमती कान्ति मल्लले हलेसी गुफामा रहेको महादेवको शिवलिंग ढाक्ने जलहरी निर्माणार्थ चाँदी चढाएका हुन् ।

२०७७ फागुन १४ गते हलेसी दर्शन गर्दा आफुले १ किलो चाँदी हलेसीमा चढाउने वचन दिएको जानकारी दिदै मल्लले भने ’मैले मेरो वाचा पुरा गरेको हुँ’ । विशुद्ध धार्मिक आस्थाले चाँदी चढाइएको चेम्बर अध्यक्ष मल्लले बताए । मल्ल दम्पतीले व्यक्तिगत रूपमा चढाएका चाँदीबाट शिवलिंग ढाक्ने जलहरी बनाइने हलेसी तुवाचुङ नगरपालिकाका नगरप्रमुख इवन राईले जानकारी गराए ।

३२ वर्षदेखि सफल व्यवसायीका रूपमा ख्यातिप्राप्त मल्लले चेम्बरको कार्यालयमा हलेसी तुवाचुङ नगरपालिकाका नगरप्रमुख राईलाई १ किलो चाँदी आइतबार हस्तान्तरण गरेका हुन् । प्राप्त चाँदी नगरप्रमुख राईले हलेसीमा बुझाउनेछन् ।