छात्रालाई ठक्कर दिएर बस भागेपछि चाबहिलमा तनाव, गाडीमा आगजनी र तोडफोड

काठमाडौं, पुस ७ – सोमबार विहान बा ५ ख ५९३० नम्बरको यात्रुबाहक बसले एकजना क्याम्पस जान लागेकी छात्रालाइ सुकेधारा नजिकै ठक्कर दिँदा उनी घाइते भएकी छिन् । घाइते छात्रा चाबहिलस्थित पशुपति क्याम्पसमा अध्ययनरत गोरखाकी २२ वर्षीया सृष्टि पन्त रहेकी छिन् ।

ठक्कर दिएर बस भागे पनि आक्रोशित विद्यार्थीहरूको भीडले चाबहिल क्षेत्रमा अवरोध र प्रदर्शन गरेका छन् । उनीहरुले अन्य गाडीमा तोडफोड र आगजनी गरेका हुन् ।

विद्यार्थीको भीडले बा ४ ख ७१०१ नम्बरको बसमा आगजनी गरेका छन् भने बा ३ ख ४४३३ नम्बरको बसमा तोडफोड गरेका प्रहरीले जनाएको छ ।आक्रोशित भीडलाई नियन्त्रणमा लिन पशुपति क्याम्पस वरपर ठूलो संख्यामा प्रहरी परिचालन गरिएको छ ।

बसको ठक्करबाट घाइते पन्तको चाबहिलकै ओम अस्पतालमा उपचार भइरहेको प्रहरीले जनाएको छ ।