जसरी भए पनि केपी ओलीलाई हटाउन लागिएको छ : प्रचण्ड

काठमाडौं, चैत ५ – नेकपा माओवादी केन्द्रका अध्यक्ष पुष्पकमल दाहाल ले जे गरेर भए पनि केपी ओलीलाई हटाउन लागिएको बताएका छन् । सिन्धुलीमा भएको एक कार्यक्रममा बिहीबार बिहान उनले यस्तो बताएका हुन् ।

तर उनलाई हट्न नदिन संसारभरका शक्ति लागेको बताए । तर पनि केहीदिनमा नै नयाँ सरकार बन्ने बताए ।

“जे गरेर भए पनि केपीलाई हटाउन लागिएको छ,” दाहालले भने, “एकातिर केपी अर्कोतिर हामी भएका छौँ । हाम्रो पछि जनता छन् केपीका पछाडि प्रतिक्रियावादी छन् । तत्काल जसरी पनि केपी हटाउने हो । हिजो केपीको कदमलाई असंवैधानिक भन्नेहरुबीच एकता गरेर केपी हटाउने हो । काठमाडौं पुग्नेबित्तिकै गर्ने काम त्यही हो । यो हुन नदिन ठूला शक्ति लागेका छन् । संसारभरका ठूला शक्ति लागेका छन् । मैले उनीहरुलाई भनेअनुसार गरिनँ । मैले संविधान जारी नगर भन्दा मानिनँ त्यही भएर उनीहरुले मलाई रुचाएका छैनन् ।”

दाहालले नेकपा एमालेमै रहेका मन्त्रीहरुप्रति आक्रोश व्यक्त गरेका छन् । सिध्दिइसकेका व्यक्तिलाई अघि सार्दा आफूले धोका पाएको उनको टिप्पणी थियो ।

“केपी ओलीलाई चिन्न गल्ती भयो । फटाहा जाली झेली रहेछन्,” दाहालले सिन्धुलीमा आयोजित एक कार्यक्रममा बिहीबार बिहान भने, “केपी ओलीको मनभित्र पस्न सकिएन ।  पार्टीमा पनि फटाहालाई बढी विश्वास भयो । मैले नियतले त होइन तर गर्ने बेलामा अलि बुद्धि पु¥याइनँ । सकिइसकेको मान्छेलाई स्थायी समितिमा लगेँ । आत्मसमीक्षा गर्नैपर्ने देखेँ । आएर रोएपछि मन्त्रीमा पठाएँ । अहिले महंगो मन्त्रीको रुपमा बिक्री भए । अर्का लालगद्धारलाई लौ गृह मन्त्री खाउ भनेर दिएँ । त्यहाँबाट पनि धोका भयो ।”