झापाको निषेधाज्ञामा थप कडाइ , पसलहरु १० बजे सम्म मात्र खुल्ला गर्न पाइने

काठमाडौं, वैशाख २२ –   कोरोनाको संक्रमण दर नरोकिए पछि झापामा जारी निषेधाज्ञा थप कडा पारिएको छ ।यसअघि गएको १७ गते जिल्ला प्रशासन कार्यालयले झापामा आंशिक निषेधाज्ञा घोषणा गरेको थियो । १९ गते मध्य रातिदेखि २६ गते मध्यरातिसम्म लागु हुने गरि घोषणा गरिएको निषेधाज्ञामा सवारी साधन सञ्चालनमा जोर–बिजोर प्रणाली लागु गरिएको थियो बजार पसल बिहान ११ बजे सम्म खुल्ला गर्न दिइएको थियो । तर फेरि जारी गरिएको निषेधाज्ञामा भने यो भन्दा कडाइ गरिएको छ ।

के के मा कडाइ

२२ गते मध्यरातदेखि ३१ गते मध्यरातसम्म लागु हुने गरि घोषणा गरिएको दोश्रो पटकको निषेधाज्ञामा अत्यावश्यक बस्तुका पसलहरु १० बजे सम्म मात्र खुल्ला गर्न पाइने छ ।यस्तै होटल, रेष्टुरेन्ट तथा चिया पसल समेत पूर्ण रुपमा बन्द गर्न आदेश गरिएको छ भने अनलाईन अर्डर र होमडेलिभरीका लागि खाद्यबस्तु भने लिएर जान पाइने भनिएको छ ।यसअघि गतेका आधारमा जोर–बिजोर प्रणाली लागु गरि यातायात सञ्चालन गर्न दिइएकोमा दोश्रो पटकको निषेधाज्ञा अवधी भरि भने कुनै पनि सार्वजनिक तथा निजी सवारी साधन सञ्चालन हुन नपाउने आदेशमा उल्लेख छ ।अत्यावश्यकीय सेवाका सवारी साधन भने निषेधाज्ञा अवधिमा पनि चल्ने छन् । यस्तै वैवाहिक कार्यक्रममा बढीमा २५ जना भेला हुन, बढीमा १० जना जन्ती जान र बढीमा २ ओटा सवारी साधन मात्र प्रयोग गर्न भनिएको छ ।