जनवरीको शुरुवातसम्ममा कोरोनाविरुद्धको भ्याक्सीन पाइने : डाक्टर एन्थोनी फाउची

काठमाडौं, कार्तिक १४ – कोरोना भाइरसको भ्याक्सीनलाई लिएर अमेरिकाका शीर्ष संक्रामक रोग विशेषज्ञ डाक्टर एन्थोनी फाउचीले अब छिटै नै कोरोनाविरुद्धको भ्याक्सीन पाइने बताएका छन् ।

उनले सबै ठीक भएमा डिसेम्बरको अन्तिम वा जनवरीको शुरुवातसम्ममा कोरोनाविरुद्धको भ्याक्सीन पाइने बताएका हुन् । कोरोना भाइरसको महामारी अहिले सारा विश्वमा नै फैलिएको छ ।

गत वर्षको डिसेम्बर अन्तिम साता चीनको वुहान शहरमा पहिलोपटक देखिएको कोरोना भाइरसको संक्रमण लगभग एक वर्ष पुग्न लाग्दा विश्वका २१६ वटा देशहरुमा पुगिसकेको छ ।

हालसम्म विश्वमा ११ लाख ८६ हजार ३९३ जनाको मृत्यु भएको छ भने ४ करोड ५३ लाख ४७ हजार ७०० जनालाई कोरोना संक्रमण भएको छ । त्यस्तै ३ करोड २९ लाख ९५ हजार ९५२ जना संक्रमण मुक्त भएका छन् ।