थप १७९ जनामा कोरोना संक्रमण पुष्टि, १११ जना संक्रमणमुक्त

काठमाडौं, चैत २० – नेपालमा पछिल्लो २४ घण्टामा कोरोना भाइरसका १७९ जना नयाँ संक्रमित थप भएका छन् । पीसीआर विधिबाट ३ हजार ५६५ जनाको स्वाब परीक्षण गर्दा उक्त संख्यामा संक्रमित पुष्टि भएको हो । यो सँगै नेपालमा कोरोना भाइरसबाट संक्रमित हुनेको संख्या २ लाख ७७ हजार ६४० जना पुगेको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा १११ जना संक्रमित निको भएर अस्पतालबाट डिस्चार्ज भएका छन् ।

यो सँगै नेपालमा कोरोना भाइरसको संक्रमण जितेर घर फर्किनेको संख्या २ लाख ७२ हजार ९६२ जना पुगेको छ । यस्तै पछिल्लो २४ घण्टामा देशभर कोही पनि संक्रमितको मृत्यु नभएको मन्त्रालयले जनाएको छ । बिहीबारसम्मको विवरणअनुसार नेपालमा हालसम्म कोरोना भाइरसको संक्रमणबाट मृत्यु हुनेको संख्या ३ हजार ३१ जना पुगेको छ । हाल देशभर सक्रिय संक्रमितको संख्या १ हजार ६४७ जना छ । मन्त्रालयका अनुसार हालसम्म नेपालमा २२ लाख ७९ हजार १०५ जनाको पीसीआर विधिबाट स्वाब परीक्षण गरिएको छ भने अहिले १ हजार ६४७ जना आइसोलेसन र ६१ जना क्वारेन्टिनमा छन् ।