थप ४,७६२ जनामा कोरोना भाइरसको संक्रमण पुष्टि, ६,४९१ जना संक्रमणमुक्त

काठमाडौं, जेठ १७ – नेपालमा पछिल्लो २४ घण्टामा थप ४ हजार ७६२ जनामा कोरोना भाइरसको संक्रमण पुष्टि भएको छ । बितेको २४ घण्टामा देशभर १५ हजार ५५ जनाको आरटी–पीसीआर र २ हजार ४२५ जनाको एन्टिजेन परीक्षणबाट ४,७६२ जनामा संक्रमण पुष्टि भएको हो । यो सँगै नेपालमा कोरोना भाइरसबाट संक्रमित हुनेको संख्या ५ लाख ६१ हजार ३०२ जना पुगेको छ ।

नेपालमा पछिल्लो २४ घण्टामा कोरोना भाइरस संक्रमणका कारण ११४ जनाको मृत्यु भएको छ । यो सँगै नेपालमा कोरोना भाइरसको संक्रमणका कारण ज्यान गुमाउनेको संख्या ७ हजार ३८६ जना पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ६ हजार ४९१ जना संक्रमित निको भएका छन् । यो सँगै नेपालमा कोरोना भाइरसको संक्रमणमुक्त हुनेको संख्या ४ लाख ४७ हजार ४४६ जना पुगेको छ । यो कुल संक्रमितको ७९.७ प्रतिशत हो ।

हाल देशभर सक्रिय संक्रमितको संख्या १ लाख ६ हजार ४७० जना छ । मन्त्रालयका अनुसार हालसम्म नेपालमा ३० लाख ५७ हजार ४२४ जनाको आरटी–पीसीआर विधिबाट स्वाब परीक्षण गरिएको छ भने अहिले १ लाख ६ हजार ४७० जना आइसोलेशन र ६८९ जना क्वारेन्टिनमा छन् ।