थप ६,८२५ जनामा कोरोना भाइरसको संक्रमण पुष्टि, ७५ जनाको मृत्यु

काठमाडौं, जेठ २० – नेपालमा पछिल्लो २४ घण्टामा थप ६ हजार ८२५ जनामा कोरोना भाइरसको संक्रमण पुष्टि भएको छ । बितेको २४ घण्टामा देशभर १८ हजार ५६२ जनाको आरटी–पीसीआर र ३ हजार २११ जनाको एन्टिजेन परीक्षणबाट ६,८२५ जनामा संक्रमण पुष्टि भएको हो । यो सँगै नेपालमा कोरोना भाइरसबाट संक्रमित हुनेको संख्या ५ लाख ७६ हजार ९३६ जना पुगेको छ ।

नेपालमा पछिल्लो २४ घण्टामा कोरोना भाइरस संक्रमणका कारण ७५ जनाको मृत्यु भएको छ । यो सँगै नेपालमा कोरोना भाइरसको संक्रमणका कारण ज्यान गुमाउनेको संख्या ७ हजार ६३० जना पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ५ हजार ९०४ जना संक्रमित निको भएका छन् । यो सँगै नेपालमा कोरोना भाइरसको संक्रमणमुक्त हुनेको संख्या ४ लाख ६७ हजार ४६७ जना पुगेको छ । यो कुल संक्रमितको ८१ प्रतिशत हो ।

हाल देशभर सक्रिय संक्रमितको संख्या १ लाख १ हजार ८३९ जना छ । मन्त्रालयका अनुसार हालसम्म नेपालमा ३१ लाख ६ हजार ९३८ जनाको आरटी–पीसीआर विधिबाट स्वाब परीक्षण गरिएको छ भने अहिले १ लाख १ हजार ८३९ जना आइसोलेशन र ७२५ जना क्वारेन्टिनमा छन् ।