दया फाउण्डेशनद्वारा विभिन्न अस्पताललाई चिकित्सा उपकरण प्रदान [फोटोफिचर]

काठमाडौं, जेठ २१ – दया फाउण्डेशनले देशमा व्याप्त कोरोना महामारीको संक्रमणको उपचारको क्रममा खडा भएका चुनौती तथा समस्याहरूको समाधानमा राहत पुर्याउने उद्देश्यले विभिन्न सामुदायिक तथा सरकारी अस्पतालहरूलाई विभिन्न चिकित्सा उपकरणहरू प्रदान गरेको छ ।

संस्थाले टेकु अस्पताल, वीर अस्पताल, ट्रमा सेन्टर, क्षेत्रपाटी निःशुल्क चिकित्सालय, भक्तपुर क्यान्सर अस्पताल, त्रिवि शिक्षण अस्पताल, पाटन अस्पताल, नेपाल एम्बुलेन्स सर्भिस र आनन्द कुटी आइसोलेशन सेन्टरलाई ती सामग्री सहयोग गरेको हो ।

फाउण्डेशनले ६ थान हाई–फ्लो नेशल क्यानुला, ५ थान ५ लिटरको अक्सिजन कन्सन्ट्रेटर, १० थान १० लिटरको अक्सिजन कन्सन्ट्रेटर, १५ थान थर्मल गन, १५ थान अक्सिमिटर साथै १००० थान सुरक्षा किट (पीपीई, फेससिल्ड, सेनिटाइजर, मास्क, पञ्जा) प्रदान गरेको छ ।

विद्यमान स्वास्थ्य सङ्कटका बेला थोरै नै भए पनि सहयोग गर्न पाएकोमा फाउण्डेशनले खुशी व्यक्त गरेको छ । संस्थाले सहयोग गरेको अस्पतालहरू विशेषतः निम्न आय भएका वर्गहरूको उपचारका लागि लक्षित भएको हुँदा यस सहयोगले विपन्न वर्गको कोभिड–१९ को उपचारमा टेवा पुर्याउने दया फाउण्डेशनका अध्यक्ष राजेश प्रधानले बताए । साथै निजी क्षेत्र पनि यस विषम् परिस्थितिमा अगाडि आई समाज सेवामा अग्रसर हुनुपर्नेमा उनले जोड दिए ।

उक्त संस्थाबाट कोभिडसम्बन्धी कार्यक्रमहरूको समन्वय तथा संयोजन गर्दै आएका संस्थाका पूर्वध्यक्ष किपा माथेमाका अनुसार फाउण्डेशनले विविध स्वास्थ्य उपकरणहरू उपलब्ध गराउने मात्र नभई संक्रमितको उपचारमा संलग्न रहँदै आएका जनशक्तिको क्षमता अभिवृद्धिका लागि पनि विभिन्न तालिमहरूका लागि आयोजना गरिने बताए ।

फाउण्डेशनले क्रिटिकल केयर नर्सिङ्ग संघ नेपाल र नेपाल क्रिटिकल केयर विकास फाउण्डेशनसँगको सहकार्यमा क्रिटिकल केयर नर्सिङ्गसम्बन्धी भर्चुअल प्रशिक्षण कार्यक्रम सञ्चालन गरिरहेको छ भने कोरोना उपचारका क्रममा आवश्यक विशेष शीप नर्सहरूलाई उपलब्ध गराउने उद्देश्यले गत जेठ ९ गते थालिएको प्रशिक्षण आज सम्पन्न गरेको छ ।

दया फाउण्डेशन समाजसेवी स्व. दयाराम भक्त माथेमाको स्मृतिमा उहाँको परिवारद्वारा पारिवारिक ट्रष्टको रूपमा समाजसेवाका लागि सन् २००९ मा स्थापित संस्था हो । जसको मूलभूत उद्देश्य शिक्षा, स्वास्थ्य र संस्कृति पर्दछ ।

कोरोना महामारीको पहिलो लहरमा उल्लेख्य स्वास्थ्य सेवा उपलब्ध गराएबापत टेकु अस्पताल, वीर अस्पताल, कान्ति बाल अस्पताल तथा क्षेत्रपाटी निःशुल्क चिकित्सालयको कोभिड नर्सिङ्ग युनिटलाई दया फाउण्डेशनले ‘एक्सलेन्स अवार्ड’बाट सम्मानित गरिसकेको छ ।