धनुषामा बम विस्फोट: तीनको मृत्यु, ५ घाइते

जनकपुर,मंसिर २८ – धनुषाको क्षिरेश्वरनाथ नगरपालिका ५ महेन्द्रनगर बजारमा शक्तिशाली बम विस्फोट भएको छ । विस्फोटमा परि तीन जनाको मृत्यु भएको छ भने ५ जना गम्भीर घाइते भएका छन् ।

शुक्रबार मध्यराति भएको बम विस्फोटमा स्थानीय ४६ वर्षका राजेश्वर साह र उनका छोरा २४ वर्षीय आनन्द साहको घटनास्थलमै मृत्यु भएको छ भने प्रहरी निरीक्षक अमिर दाहालको शनिबार बिहान उपचारको क्रममा धरानमा ज्यान गएको प्रहरीले जनाएको छ ।

शुक्रबार राति १२ बजे राजेश्वरको घरको शौचालय नजिक छाडिएको बम विस्फोट भएको हो ।

विस्फोटमा परी प्रहरी जवान रिजन महतो, मृतक घरमुली राजेश्वर साहका अर्का छोरा प्रकाश र छोरी अञ्जली गम्भीर घाइते भएका छन्। जनकपुर प्रादेशिक अस्पतालमा उपचार सम्भव नभएपछि उनीहरुलाई धरान लगिएको छ ।

विष्फोटबाट राजेश्वरको घरमा सामान्य क्षति पुगेको छ । बेलुकै देखि बम राखिएको हल्ला चलेको र राति विस्फोट भएको स्थानीय बासिन्दाले बताएका छन् । विस्फोट प्रहरी चौकी नजिकै भएको हो ।