नरोत्तमले माफी माग्दै भने : बढी बोलेछु,मेरो भनाइ रेकर्डबाटै हटाइयोस्

 काठमाडौं, जेठ २९ – प्रधानमन्त्री केपी शर्मा ओलीविरुद्ध नाथुराम गोड्से बन्ने बताएका बाग्मती प्रदेशका कांग्रेस सांसद नरोत्तम वैद्यले आफ्नो भनाइ फिर्ता लिएका छन् ।आज बसेको बाग्मती प्रदेशसभा बैठकमा विषेश समय लिएर बोल्दै सा.सद वैद्यले आफुले गलत मनसाय नराखेको आवेगमा आएर गलत शब्द बोलेको भन्दै आत्मालोचना गर्दै आफ्नो भनाइ फिर्ता लिएका हुन् ।

प्रदेशसभा बैठकमा उनले भने,‘वास्तवमा सम्माननीय प्रधानमन्त्रीप्रति मेरो व्यक्तिगत रिसिइवी पनि हैन । म महात्मा गान्धीलाई सम्मान गर्ने र वचनले पनि कसैलाई हिंसा नहोस् भन्ने मान्छे हो । जुन किसिमबाट सत्ता बचाउनका लागि जुनसुकै हतकण्डा अपनाएको देखिन्छ । त्यो कुराबाट म आवेशमा आएर भावावेषमा आएर आवश्यकताभन्दा अलिकति बढि बोले भन्ने लागेको छ ।’

प्रदेशसभाको बैठकमा सांसद वैद्यले आफुले बोलेको शब्द आपत्तीजनक र संसदको मर्यादाविपरित रहेको महसुस गर्दै फिर्ता लिएको र संसदको रेकर्डबाट समेत हाटाउन आग्रह गरे ।

उनले भने,‘मैले मबाट प्रयोग भएको शब्दहरु आपत्तीजनक र संसदीय मर्यादाविपरित रहेको भनेर मेरो संसदीय दलले निर्देशन दिएको र म आफैले पनि गलत बोलेको अनुभूति भएका कारणले मैले बोलेको शब्द फिर्ता लिएर संसदको रेकर्डबाट समेत हटाउनका लागि आग्रह गर्दछु ।’

सांसद वैद्यले शान्तिपुर्ण राजनीतिमा विश्वास गर्ने दलका कार्यकर्ता भएको र आफु महात्मा गान्धीको अनुयायी रहेको समेत भनेका छन् । उनले आफु हिंसाविरोधी रहेको र वचनका कारणले समेत कसैको हिंसा गर्नुहुँदैन भन्ने मान्यता रहेको प्रदेशसभामा बताए ।

‘मैले नेपालको संविधानको धाराा १ सय ८७ अनुसार पुर्ण वाक स्वतन्त्रताको प्रयोग गरेर बोलेको हो । कुने ठाउँमा उजुर बाजुर नलाग्ने व्यवस्थाकै आधारमा आफुलाई लागेको कुरा दिल खोलेर राखेको हो । पार्टीको पनि ध्यानाकर्षण भएको छ । पार्टीले पनि आत्मालोचना गर्न भनेको छ । त्यसैले म आत्मालोचना समेत गर्छु,’ सांसद वैद्यले भने ।