नेपाल-अमेरिका अन्तर्राष्ट्रिय फिल्म फेस्टिभल भोलिदेखि भर्चुअल माध्यममा सुरु हुँदै

फेस्टिभलमा नेपाल र अमेरिका लगायत विश्वका १४ देशका ३० फिल्म प्रदर्शन हुने

काठमाडौं ।नेपाल(अमेरिका अन्तर्राष्ट्रिय फिल्म फेस्टिभल यसवर्ष भर्चुअल माध्यममार्फत आयोजना हुने भएको छ । बुधबारदेखि सुरु हुने फेस्टिभल चारदिनसम्म संचालन हुने जारी विज्ञप्तिमा उल्लेख छ ।

यसअघि यो फेस्टिभल अमेरिकाको मेरिल्यान्ड राज्यमा आयोजना हुँदै आएको थियो । कोरोनाभाइरस महामारीको कारण यसवर्ष फेस्टिभल भर्चुअलरुपमा सीमित भएको हो । फेस्टिभलमा नेपाल र अमेरिका लगायत विश्वका १४ देशका ३० फिल्म प्रदर्शन हुने कुरा आयोजकले जानकारी गराएका छन्।

नेपाली समयानुसार बिहीबार साँझ भर्चुअल रुपमा फेस्टिभलको उद्घाटन भएर आइतबार साँझ समापन समारोह तथा पुरस्कार वितरण हुनेछ। महोत्सव अवधिभर स्मार्ट फोन, आइप्याड, कम्प्युटर, ल्यापटप र स्मार्ट टेलिभिजनमा इवेनटिभ एप मार्फत निशुल्क हेर्न सकिनेछ।

प्रदर्शन भएका फिल्मबारे दर्शक र फिल्म निर्माता–निर्देशक तथा कलाकारसँग छलफल कार्यक्रम पनि आयोजना गरिने छ । प्रतिष्पर्धाका लागि छानिएका उत्कृष्ट फिल्मलाई पुरस्कृत पनि गरिनेछ ।

फिल्म महोत्सव २०२१ का लागि ६ जना महिलाहरुको निर्णायक मण्डलले उत्कृष्ट फिल्मको पुरस्कार घोषणा गर्नेछ। नेपालबाट रम्यता लिम्बु, अमेरिकाबाट सपना शाक्य, रिबेका बिसमानते, निना स्ट्रिच्क, रिता मेहर र पोर्सिया कोब जुरीको रुपमा छन्। महोत्सवमा आवेदन परेका फिल्मलाई फिल्म सोसाइटीको चलचित्र छनोट समितिले प्रदर्शनका लागि छनोट गरेको थियो।

कोरोनाभाइरस महामारीको कारण २०२० को महोत्सव स्थगित भएता पनि साउथ एसियन फिल्म फेस्टिभलहरुको नेटवर्कमा कोसाफको आयोजना भएको थियो। २०२१ को संस्करण भने भर्चुअल रुपमा हुँदैछ । फिल्म यो लिंकमा हेर्न सकिनेछ ।