नेपाल दूरसञ्चार प्राधिकरणले निषेधाज्ञा अवधिभर इन्टरनेटको शुल्क नबुझाए पनि सेवा अवरुद्ध नगर्न सेवा प्रदायकलाई निर्देशन

काठमाडौं, वैशाख २२ –नेपाल दूरसञ्चार प्राधिकरणले सरकारले जारी गरेको निषेधाज्ञा अवधिभर इन्टरनेटको शुल्क नबुझाए पनि सेवा अवरुद्ध नगर्न सेवा प्रदायकलाई निर्देशन दिएको छ ।प्राधिकरणले बुधबार एक सूचना जारी गर्दै सेवा प्रदायकलाई निषेधाज्ञा अवधिभर इन्टरनेट निरन्तर सञ्चालन हुने व्यवस्था गर्न निर्देशन दिएको हो ।

हाल कोरोना भाइरसको दोस्रो चरणको संक्रमण काठमाडौं उपत्यका लगायत देशका अधिकांश भागमा फैलिरहेकाले नेपाल सरकारले ४१ भन्दा बढी जिल्लामा निषेधाज्ञा जारी गरेकाे छ ।यस्तो अवस्थामा इन्टरनेटको माग दिनहुँ बढ्दाे छ । प्राधिकरणले जारी गरेको सूचनामा भनिएको छ, ‘अर्कोतर्फ घरभित्र बस्नुपर्दा सेवाग्राहीले पैसा तिर्न सकिरहेका छैनन् । यस्तोमा सेवाप्रदायकले इन्टरनेट तथा टेलिफोन सेवा अवरुद्ध गरिरहेको गुनासो आएको छ ।’

त्यसैले सेवाप्रदायकले सकेसम्म अनलाइन भुक्तानीको व्यवस्था गर्न प्राधिकरणले निर्देशन दिएको छ । भने, सर्भिस सेन्टरमार्फत दूरी कायम गरी ग्राहकलाई सहज हुने गरी सेवा दिन पनि प्राधिकरणले आग्रह गरेको छ । यदि यो पनि सम्भव नभएको खण्डमा निषेधाज्ञाभर सेवा अवरुद्ध नगर्न प्राधिकरणले निर्देशन दिएको हो ।