नेपाल राष्ट्र बैंकले सोमबार १७ अर्ब १० करोड बराबरको ट्रेजरी बिल बिक्री गर्ने

काठमाडौं, कात्तिक २३ – नेपाल राष्ट्र बैंकले सोमबार १७ अर्ब १० करोड बराबरको ट्रेजरी बिल बिक्री गर्ने भएको छ । केन्द्रीय बैंकको सूचनाअनुसार उक्त परिमाणको ट्रेजरीबिल बोलकबोल प्रक्रियाका माध्यमबाट बिक्री गर्न लागिएको हो ।

बैंकका अनुसार सबै परिमाणको ट्रेजरी बिल नवीकरण गर्न लागिएको हो । त्यसमध्ये पाँच अर्बबराबरको ट्रेजरी बिल भने २८ दिनका लागि बिक्री गरिनेछ । उक्त बिल आगामी मंसिर २३ गते परिपक्व हुनेछ । यस्तै, १० करोडबराबरको ट्रेजरी बिल ९१ दिनका लागि बिक्री गरिँदै छ ।

उक्त बिल आगामी माघ २७ गते परिपक्व हुनेछ । त्यस्तै, १२ अर्बबराबरको ट्रेजरी बिल भने १८२ दिनका लागि बिक्री गर्न लागिएको हो । उक्त ट्रेजरी बिल भने ०७८ साल वैशाख २८ गते परिपक्व हुनेछ । बैंकले यही कात्तिक १७ गते एक अर्ब ६६ करोडबराबरको ट्रेजरी बिल बिक्री गरेको थियो ।