नेपाल र भारतबीच व्यावसायिक हवाई उडान कात्तिक १ बाट सञ्चालन हुने

काठमाडौँ, आश्विन २५ – सात महिनादेखि बन्द नेपाल र भारतबीच व्यावसायिक हवाई उडान खुलाउनेबारे पहल सुरु भएको छ । संस्कृति, पर्यटन तथा नागरिक उड्डयनमन्त्री योगेश भट्टराई र नेपालका लागि भारतीय राजदूत विनय मोहन क्वात्राबीच शुक्रबार सिंहदरबारमा यसबारे छलफल भएको हो । २०७६ चैत ९ गतेदेखि रोकिएको उडान कात्तिक १ देखि सञ्चालन गर्नेबारे छलफल भएको स्रोतको भनाइ छ ।

लकडाउन खुकुलो गरेसँगै नेपालले १ सय ६४ दिनपछि भदौ १६ देखि अन्तर्राष्ट्रिय उडान सञ्चालन गरेको थियो । तर, भारतले अझै अन्तर्राष्ट्रियतर्फ नियमित उडान खोलिसकेको छैन ।

‘तीन साताअघि भारतले नेपालमा रहेका आफ्ना नागरिकलाई मात्रै सेवा दिने उद्देश्य राखेर नेपाल सरकारमार्फत नागरिक उड्डयन प्राधिकरणलाई प्रस्ताव पठाएको थियो,’ प्राधिकरणका एक उच्च अधिकारीले भने, ‘एयर बबल नामकरण गरिएको उक्त प्रस्तावमा नेपाल र भारतले आ–आफ्ना नागरिकलाई मात्रै हवाई सेवा दिने प्रस्ताव पठाएको थियो ।’

उनका अनुसार भारतले नेपालसहित थुप्रै एसियाली मुलुकमा एयर बबल मोडलबाट नियमित उडान गर्ने तयारी गरिरहेको छ । उक्त प्रस्तावलाई प्राधिकरणले अनुमतिका लागि तालुक निकाय संस्कृति, पर्यटन तथा नागरिक उड्डयन मन्त्रालयमा पठाएको थियो । मन्त्रालयले भारतको उक्त प्रस्तावलाई कोभिड–१९ संकट व्यवस्थापन केन्द्र (सीसीएमसी) मा पठाएको थियो ।