पटाका पड्काउँदा ६ घरमा आगलागी

काठमाडौं, २७ कार्तिक – सप्तरीमा आगलागी हुँदा ६ वटा घर जलेका छन्। बिहीबार साढे ११ बजेतिर डाक्नेश्वरी नगरपालिका-३ की बतहीदेवी मुखियाको घरबाट आगलागी सुरू भएको थियो। 

सोही आगो फैलिएर छिमेकी पाँच घरमा पनि क्षति पुगेको जिल्ला प्रहरी कार्यालय सप्तरीले जनाएको छ। ‘बालबालिकाहरूले पटाका पड्काउने क्रममा आगलागी भएको रहेछ,’ प्रहरी नायब उपरीक्षक भुवनेश्वर शाहले भने। 

आगलागी अहिले नियन्त्रणमा आइसकेको जानकारी दिए। आगलागीबाट राजकुमार मुखिया, रामरूप मुखिया, मिथलेशकुमार मुखिया, नरेश मुखिया र मुकेशकुमार मुखियाको घर जलेका छन्।

प्रहरी नायब उपरीक्षक शाहका अनुसार केही घर पूर्ण रूपमा जलेका छन् भने केही घर आशिंक जलेका हुन्। प्रारम्भिक अनुसन्धानबाट अहिलेसम्म १३ लाख ९६ हजार रुपैयाँको क्षति भएको प्रहरीले जानकारी दिएको छ।