प्रधानमन्त्रीले मन्त्री–सचिवलाई भने- ‘सोभियत संघ किन अघि बढेन, हेक्का राख्नुस्’

काठमाडौँ — दुई महिनाअघि गरेको कार्यसम्पादन सम्झौताअनुसार सरकारका काममा अपेक्षित उपलब्धि नभएपछि बिहीबार प्रधानमन्त्री केपी शर्मा ओलीले ‘सोभियत संघ किन अघि बढेन, हेक्का राख्नुहोस्’ भन्दै कम्युनिस्ट सत्ता ढलेको इतिहास मन्त्री र सचिवहरूलाई सम्झाएका छन् ।

नयाँ आर्थिक वर्षको पहिलो समीक्षा बैठकमा बिहीबार प्रधानमन्त्री ओलीले सोभियत संघ असफल भएको कुरालाई पाठका रूपमा लिन आग्रह गरे । ‘सोभियत संघमा पनि आफ्नो देश आफैं बनाउने लहर त चलेको थियो नि तर विकास गरौं भन्नेमा सबै जागरुक नहुँदा सफल हुन सकेन,’ प्रधानमन्त्रीको भनाइ उद्धृत गर्दै बैठकका एक सहभागीले भने, ‘हामीले त्यहाँबाट पाठ सिक्नुपर्छ । नेतृत्वको मात्रै मुख ताक्नु हुन्न ।’ रुससहितका धेरै देश मिलेर बनेको सोभियत संघ लक्ष्यअनुसार अघि नबढ्दा १९९० को दशकमा विघटन भएको थियो । विश्वभर कम्युनिस्टहरूको असफलताको उदाहरणका रूपमा सोभियत संघ विघटनलाई लिने गरिन्छ ।

प्रधानमन्त्री ओलीले गत असार अन्तिममा मन्त्रीहरूसँग कार्यसम्पादन सम्झौता गरेका थिए । त्यसको आधारमा मन्त्रीहरूले सचिव र मातहत कर्मचारीसँग सम्झौता गरेका थिए । त्यसअनुसार प्रगति नभएको रिपोर्ट बिहीबारको समीक्षा बैठकमा आएपछि प्रधानमन्त्रीले असन्तुष्टि व्यक्त गरे । उनले अन्तरमन्त्रालय समन्वय गरेर विकास निर्माणका काम गर्न मन्त्रीहरूलाई निर्देशन दिएका छन् । ‘मैले बारम्बार भनिरहेको छु, फेरि पनि दोहोर्‍याउँछु, तपाईंहरूले विकास निर्माणका काममा किन समन्वय गर्नु हुन्न ?’ प्रधानमन्त्रीको भनाइ उद्धृत गर्दै एक मन्त्रीले भने, ‘आज बाटो बनाएको छ, भोलि ढल खनेको छ, पर्सि पोल उखेलेको छ ।’

उनले आफू पनि सक्रिय हुन र मातहतका कर्मचारीलाई पनि सक्रिय बनाएर काम गराउन मन्त्रीलाई सचेत गराए । ‘तपाईंहरू महत्त्वपूर्ण र गेम चेन्जर परियोजनामा केन्द्रित भएर काम गर्नुस्, फाइलहरू कतै पनि नरोकियोस्,’ उनले भने । निश्चित समयमा सक्ने भनेका काम नसकिए मान्य नहुने उनले बताए । ‘अर्कोपटक समीक्षा बैठकमा आउँदा ४ महिनामा सक्ने भनिएको काम सकिएकै हुनुपर्छ, काम नसकेर रातो चिह्न लागेको कतै पनि देख्न नपरोस्,’ प्रधानमन्त्री ओलीको निर्देशन थियो ।

काम अघि बढाउन खोज्दा अर्को मन्त्रालयको असहयोगका कारण बेलैमा सम्पन्न हुन नसकेको गुनासो सचिवहरूले गरेका थिए । अधिकांश सचिवले अर्थ, कानुन, न्याय तथा संसदीय मामिला, वन र संघीय मामिला तथा सामान्य प्रशासन मन्त्रालयमा पुगेपछि आफूहरूले अघि बढाएको कामको फाइल अड्किने गरेको गुनासो गरेका थिए ।

बैठकमा कृषि तथा पशुपन्छी विकासमन्त्री चक्रपाणि खनालले अरू मन्त्रालयबाट असहयोग भइरहेको गुनासो गरेका थिए । प्रधानमन्त्री ओलीले एकअर्कालाई असहयोग किन भइरहेको छ भन्ने प्रश्न गरेका थिए । ‘अहिले निर्धारित समयमा काम नसकेपछि आउँदो महिनामा अघिल्लो महिना छुटेको काम गर्नुहुन्छ कि पछिल्लो महिनाको ?’ उनको प्रश्न थियो ।

फेसबुक–ट्वीटर नचलाउन निर्देशन

प्रधानमन्त्री ओलीले कार्यालय समयमा सामाजिक सञ्चाल नचलाउन निर्देशन दिएका छन् । ‘कार्यालय आउने, दिनभरि फेसबुक र ट्वीटर चलाएर बस्ने गर्न भएन,’ उनको निर्देशन थियो, ‘तपाईंहरू पनि नचलाउनुस्, मातहत कर्मचारीलाई पनि नचलाउन निर्देशन दिनुस् ।’

सामाजिक सञ्जालमा समय व्यतीत गर्दा कार्यालयका गम्भीर काममा ध्यान नपुग्ने उनले बताए । पशु सेवा विभागले मासुजन्य पदार्थको पोस्टर बनाउँदा गाईको फोटो पनि राखेको तर्फ समेत ओलीले इंगित गरेका थिए।

-कान्तिपुर दैनिक