बागलुङमा जीप दुर्घटना हुँदा १४ जनाको मृत्यु

काठमाडौं, मंसिर १७ – बागलुङको बडिगाडमा जीप दुर्घटना हुँदा १४ जनाको ज्यान गएको छ भने ३ जना घाइते भएका छन् ।

गुल्मी इश्मा गाउँपालिकाको कैयापाटाबाट बागलुङको निसीखोला गाउँपालिकाका लागि छुटेको ग१ज ५२१९ नम्बरको जीप बडिगाड गाउँपालिका वडा नम्बर ७ भिमगिठेको घोकर्णामा दुर्घटना हुँदा १४ जनाको घटनास्थलमै ज्यान गएको जिल्ला प्रहरी कार्यालयले जनाएको छ ।

जीप सडकबाट ५०० मिटर तल खोलामा खस्दा ९ महिला, ४ पुरूष र एक बच्चाको मृत्यु भएको जिल्ला प्रहरी कार्यालय बागलुङले जनाएको छ । दुर्घटनामा घाइते भएका तीन जनालाई स्थानीयबासिन्दा र प्रहरीले उद्धार गरी स्वास्थ्यसंस्थातर्फ पठाएका छन् ।जीपमा १८ जना सवार रहेको प्रहरीले जनाएको छ ।