बुधबार साँझदेखि जनता र ग्लोबल आईएमई बैंकको सम्पूर्ण बैंकिङ्ग सेवा बन्द, शुक्रबारदेखि एकीकृत कारोबार

काठमाडौं, मंसिर १८- बिहिबार (मंसिर १९ ) जनता र ग्लोबल आईएमई बैंकको सम्पूर्ण बैंकिंङ सेवा बन्द हुने भएको छ । शुक्रबार (मंसिर २० गते )देखि एकीकृत कारोबार शुरु हुने भएकाले डाटा माईग्रेसन प्रयोजनको लागि दुवै बैंकको सेवा प्रभावित हुने भएको हो । जनता र ग्लोबल आईएमई बैंक मर्जरपछि ग्लोबल आइएमई बैंकको नामबाट एकीकृत कारोबार शुक्रबारदेखि हुने भएको हो।

मर्जर पछि एकीकृत कारोबार गर्नको लागि डाटा समायोजना गर्न मंसिर १८ गते साँझ ६ बजेदेखि १९ गते रातिको १२ बजेसम्म बैंकको एटीएम सेवा, क्रेडिट कार्ड सेवा मोबाइल बैंकिङ्ग, इन्टरनेट बैंकिङ्गलगायत प्रदान गरिने सबै सेवा बन्द रहेन बैंकले जनाएको छ। एकीकृत कारोबार शुरु हुने दिन मंसिर २० गतेदेखि भने बैंकका सबै सेवा सुचारु हुनेछन् ।

मर्जपछि हाल जनता बैंकमा खाता रहेका ग्राहकको खाता नम्बर परिवर्तन हुने भएकोले ग्लोबलको जुनसुकै शाखामा गएर नयाँ खाता लिन बैंकले आग्रह गरेको छ । त्यस्तै एकिकृत कारोबारपछि पनि जनता बैंकको चेकहरु नियमित नै चल्ने छ भने एटिएम म्याद नसकिएसम्म चल्ने छन् । जनता बैंकको इन्टरनेट बैंकिंङ लिएका ग्राहकले साविक कै युजर नेम र पासवर्डले ग्लोबलको इन्टरनेट बैंकिंङमा लग इन गरि सेवा लिन सक्ने छन् ।
गत असार २० गते दुई बैंकबीच मर्जरका लागि प्रारम्भिक समझदारी पत्रमा हस्ताक्षर भएको थियो । मंसिर २ गते सम्पन्न दुबै बैंकको साधारणसभाले मर्जर प्रस्ताव पारित गरेका थिए ।

मर्जरपछि बन्ने एकीकृत ग्लोबल आइएमई बैंकको अध्यक्षमा चन्द्रप्रसाद ढकाल र प्रमुख कार्यकारी अधिकृतमा हाल जनता बैंकका पर्शुराम कुँवर क्षेत्री रहने छन्। बैंकमा ग्लोबलबाट पाँच जना र जनताबाट दुई जना सञ्चालक रहनेछन्।

एकीकृत बैंकको चुक्ता पूँजी १९ अर्ब रुपैयाँ पुग्नेछ। यो चुक्ता पूँजीको आधारमा नेपालकै सबैभन्दा ठूलो हो। बैंकका ३०० शाखा कार्यलय र २५६ एटीएम, २४१ शाखा रहित बैंकिङ्ग सेवा, ३३ एक्सटेन्सन कायम हुनेछ।