बेलायतको अर्थतन्त्र वर्षौंपछि पहिलोपटक २० प्रतिशतले खुम्चियो

श्रावण २९, बिहीबार – कोरोनाभाइरस नियन्त्रणका लागि लकडाउन गरिएका कारण बेलायतको अर्थतन्त्र दोस्रो चौमासिक अवधिमा २०.४ प्रतिशतले खुम्चिएको छ । बेलायतको अर्थतन्त्र यति ठूलो स्तरमा खुम्चिएको यो वर्षौंपछि पहिलो पटक हो ।

राष्ट्रिय तथ्याङ्क कार्यालयले यस वर्षको पहिलो तीन महिनामा अघिल्लो वर्षको सोही अवधिको तुलनमा महिनैपिच्छे २.२ प्रतिशतका दरले अर्थतन्त्र खुम्चिएको जनाएको छ । यस्तो परिस्थितिमा बेलायतको अर्थव्यवस्था मन्दीतर्फ अग्रसर भएको देखाएको छ ।

युरोपका अरु मुलुकहरू खास गरी जर्मनी र फ्रान्स वा संयुक्तराज्य अमेरिकाको तुलनामा बेलायतको अथतन्त्र बढी नै सङ्कुचित भएको छ । तर तथ्याङ्क कार्यालयले लकडाउनमा सहजीकरण गर्न थालेयता जुन महिनामा अर्थतन्त्रमा निकै सुधार आएको बताएको छ । कार्यालयका अनुसार जुन महिनामा बेलायती अर्थतन्त्र ८.७ प्रतिशतले वृद्धि भएको छ ।

तथ्याङ्कशास्त्री जोनाथन अथोले जुनमा बेलायतका पसलहरू खुलेका, कारखानामा उत्पादन हुन थालेको तथा घर निर्माणका कार्यहरू पुनः शुरु भएको बताउनुभयो । बेलायत सरकारले हाल बन्द अवस्थामा रहेका पब, रेष्टुराँहरू खोल्न थालिए अर्थतन्त्रमा व्यापक सुधार आउने जनाएको छ । बेलायती अर्थमन्त्री रिशी सुनाकले कोरोनाभाइरसको प्रभाव अझै देखिएकाले कठिन समय अझै बाँकी रहेको बताउँदै अहिल्यै दशौँ हजारले रोजगारी गुमाएका र आगामी महिनामा त्यो सङ्ख्या अझ बढ्न सक्ने जानकारी दिनुभयो ।

जहाँसम्म, बेलायत सरकारले मजदुरको ज्याला भुक्तानीमा कम्पनीहरूलाई आर्थिक सहायता गरिरहेकाले पनि अर्थतन्त्रलाई पुनर्जीवन दिन सहज हुने बेलायती अर्थविज्ञहरूको ठम्याइ छ । सरकारले झण्डै १२ लाख रोजगारदाताले कामबाट बिदा दिएका झण्डै ९६ लाख मजदुरलाई तलबी आर्थिक सहायता दिइरहेको छ, र यो सहायता अङ्क करिब ४४ अर्ब डलर छ ।