बैंकका कर्मचारीलाई कोरोना लागे सबै खर्च सम्बन्धित बैंकले नै बेहोर्नुपर्ने

काठमाडौं, साउन ३० – बैंक तथा वित्तीय संस्थाका कर्मचारीहरुलाई कोरोना लागे सम्पूर्ण खर्र्च सम्बन्धित बैंकले नै बेहोर्नुपर्ने व्यवस्था गरेको छ । नेपाल राष्ट्र बैंकले बिहीबार १४ बुँदे परिपत्र जारी गर्दै बैंक तथा वित्तीय क्षेत्रलाई कर्मचारीमा संक्रमण देखिए सम्पूर्ण खर्च सम्बन्धित बैंक तथा वित्तीय संस्थाले गर्नुपर्ने व्यवस्था गरेको हो ।

संक्रमित कर्मचारीलाई अस्पतालमा, घर वा होटल जहाँ आइसोलेसनमा राखे पनि बैंकले खर्च गर्न राष्ट्र बैंकले निर्देशन दिएको छ । कर्मचारका साथै कोरोना लागेका कर्मचारीको कन्ट्याक्ट ट्रेसिङमा आएका कर्मचारीहरुलाई पनि बैंककै खर्चमा क्वारेनटाइनमा राख्न समेत भनिएको छ ।संक्रमति कर्मचारीको क्वारेनटाइन तथा आइसोलेसन अवधिभरको तलब तथा सेवा सुविधा समेत बैंकले दिनु पर्नेछ । 

राष्ट्र बैंकले २ सय भन्दा बढी संक्रमित भएका जिल्लाका बैंक शाखाहरुलाई ५० प्रतिशत कर्मचारीमात्रै राखेर सेवा सञ्चालन गर्न पनि निर्देश गरको छ । सेवा दिँदा बैंकहरुले सम्भव भएसम्म ‘वर्क फ्रम होम ’वा सहज कार्य शैली (फ्लेक्जीवल वर्किङ मोडल) अपनाउन भनेको छ । यस सम्बन्धमा बैंक तथा वित्तीय संस्थामा गरिएका कार्यहरू/निर्णयहरू तथा आन्तरिक परिपत्रहरू भोलि ३० गते शुक्रबारसम्म राष्ट्र बैंकको इमेलमा पठाइ सक्न राष्ट्र बैंकले भनेको छ।