भरतमोहन अधिकारीको दोस्रो स्मृति दिवस मनाइँदै

 काठमाडौं, १७  फागुन –वरिष्ठ वामपन्थी नेता एवं पूर्वउपप्रधान तथा अर्थमन्त्री स्वर्गीय भरतमोहन अधिकारीको सम्झनामा दोश्रो स्मृति दिवस मनाइने भएको छ । भरतमोहन अधिकारीको स्मृति फउण्डेशनको आयोजना तथा विष्णुमाया पुस्तकालयको सह–आयोजनामा आज मंगलवार विराटगरमा हुने स्मृति सभामा नेकपा अध्यक्ष एवं पूर्वप्रधानमन्त्री माधवकुमार नेपाल प्रमुख अतिथि छन् । नेपाल उक्त फाउण्डेशनका संरक्षक समेत हुन् ।

त्यस अवसरमा स्वर्गीय अधिकारीले बामपन्थी आन्दोलनमार्फत नेपालको राजनीतिक परिवर्तन, राजनीतिक अर्थशास्त्र तथा सामाजिक रुपान्तरणमा पु¥याएको योगदानको चर्चा, अग्रज कम्युनिष्ट र ज्येष्ठ नागरिक सम्मान तथा फाउण्डेशनको प्रदेश–१ समिति घोषणा गर्ने कार्यक्रम रहेको फाउण्डेशनकी सदस्य एवं अधिकारी पुत्री लीमा अधिकारीले जानकारी दिइन् ।

वि.सं १९९३ साल वैशाख २२ गते महोत्तरीको भ्रमरपुरामा बुबा रामचन्द्र र आमा पूर्णकुमारीको कोखबाट जन्मिएका अधिकारीको अधिकारीको २ वर्षको उमेरमा २०७५ साल फागुन १ गते निधन भएको थियो । अधिकारीले कानून तथा अर्थ राजनीतिको गहिरो अध्ययन गरेका थिए । अर्थशास्त्रमा एमए र कानूनमा बीएलसम्मको औपचारिक शिक्षा हासिल गरेका अधिकारी पञ्चायतकालीन समयमा चर्चित अधिवक्ता थिए ।

अधिकारीले ४०४७ सालको संविधान मस्यौदा समितिमा रहेर संविधान निर्माणमा महत्वपूर्ण योगदान गरेका थिए । २०५१ सालमा मनमोहन अधिकारी नेतृत्वको अल्पमतको लोकप्रिय सरकारमा भरतमोहन अर्थमन्त्री थिए । अधिकारीले नै आफ्नो गाउँ आफैं बनाऔं कार्यक्रममार्फत हरेक स्थानीय तहमा सिधै रकम पठाउने कामको सुरुआत गरेका थिए । यस्तै वृद्धभत्ता, सामाजिक सुरक्षा भत्ता दिने कामको सुरुआत गरेका अधिकारीलाई अहिले पनि वृद्धवृद्धाले श्रद्धापूर्वक स्मरण गर्ने गर्दछन् । अधिकारी २०४६ सालको राजनीतिक परिवर्तनपछि चारपटक सांसद र पाँचपटक मन्त्री भए । पटकपटक सरकारमा सहभागी हुँदासमेत उनी कहिल्यै विवादमा परेनन् ।