‘मायाँ आफैं हुन्छ’ लिएर आए दिनेश गौतम

काठमाडौं, १५ असार – गायक दिनेश गौतम ‘मायाँ आफैं हुन्छ’ बोलको नयाँ गीत लिएर दर्शक माझ प्रस्तुत भएका छन । गायक गौतमले भिडियो सहितको गीत सार्वजनिक गरेका हुन । गीतमा राम भट्टराईको शब्द तथा बसन्त सापकोटाको संगीत रहेको छ । भिडियोमा विनोद श्रेष्ठ र लक्ष्मी शर्मा फिचर्ड छन् । कलाकार तथा निर्माता दीपशिखा सिंह खड्काले निर्देशन गरेको भिडियोमा भेषबन्धु ढकालको छायांकन र विक्रमकुमार श्रेष्ठको सम्पादन छ । चर्चित गीत पैसा कस्ले बनायो ? बाट चर्चामा आएका गायक गौतम दुई दशकदेखी निरन्तर नेपाली गीत संगीतमा लागि रहेका छन ।

पैसा, इश्वर, प्रजुसा, प्रभाव, शीतल, चुपचाप चुपचाप, लगायत ११ म्युजिक एल्बम सार्वजनिक गरिसकेका गौतमका पैसा कस्ले बनायो ? , घरबनाउला बाँसै काटेर , फर्केर आएन मायाँलु ,इमान बेचिदिन्छ मान्छे, म मरिसके पछि लगायत थुप्रै चर्चित गीतहरु पस्किसकेका छन । विशेषगरि कालजयी गीत गाउने गौतमले थुप्रै नेपाली फिल्ममा आफ्नो सुमधुर आवाज दिई सकेका छन ।

गायन मात्र नभएर नेपाली साहित्यमा पनि निकै राम्रो कलम चलाउने गौतम लेखन तर्फ पुस्तकप्रसादको नामले परिचित छन । उनका फेरि गीत फेरि गजल , (गीत, गजल संग्रह ) र ‘पुस्तक’ नामको गीत संग्रह प्रकाशित छन । कविता गीत र गजलमा सशक्त कलम चलाउने गौतमले पैसा कस्ले बनायो गीत आफ्नै लेखन, सङीत, र आवाजमा तयार पारेका थिए । उक्त गीतबाट उनको चर्चा चुलिएको थियो ।

गजल गायनमा समेत उत्तिकै दमदार र अब्बल प्रस्तुती दिन सफल गौतम उर्फ ‘पुस्तकप्रसाद’ लाई लेखक संगीतकार तथा कुशल गायकको त्रीवेणी मान्न सकिन्छ ।