मेलम्चीको पानी ; काठमाडौं बासीले दैनिक ५१ करोड लिटर पानी पाउने

काठमाडौं, चैत ११ – लामो समयदेखि खानेपानीको अभाव झेल्दै आएका उपत्यकाबासीको धारामा अब एक साताभित्र नै मेलम्चीको पानी आउने दाबी खानेपानी मन्त्रालयले गरेको छ । यही चैत १५ गतेदेखि नै मेलम्चीको पानी उपभोक्ताको धारामा ल्याउने गरी तयारी पूरा भएको मन्त्रालयले जनाएको छ । आयोजनाका अनुसार चैत १५ गते परीक्षणको क्रममा पानी उपभोक्ताको धारामा पठाइनेछ । आयोजनाका अनुसार बागमतीमा पठाउने भनिएको पानी उपभोक्ताको धारामा पठाएर आगामी १ साताभित्र नै उपभोक्ताले मेलम्चीको पानी उपभोग गर्न पाउने गरी तयारी थालिएको छ ।

पटक पटक मेलम्ची खानेपानी आयोजनाको भाका सर्दै आएको थियो । मेलम्ची खानेपानी आयोजनाका अनुसार सुन्दरीजलमा साढे आठ-आठ करोड पानी प्रशोधन गर्न सकिने दुईवटा प्रशोधन केन्द्र बनाइएका छन् । खानेपानी मन्त्रालयका अनुसार, मेलम्ची खानेपानी आयोजना सम्पन्न भएपछि दैनिक १७ करोड लिटर पानी काठमाडौं आउनेछ । काठमाडौंमा मात्रै दैनिक ४५ करोड लिटर दैनिक आवश्यक छ । हाल १३ करोड लिटरमात्रै आपूर्ति भइरहेको छ । मेलम्चीको पहिलो चरणको आयोजना सम्पन्न भएपछि १७ करोड लिटर पानी थप हुनेछ । दोस्रो चरणको आयोजना सम्पन्न भएपछि भने पुन थप ३४ करोड लिटर पानी वितरण हुने सरकारको योजना छ । मेलम्चीको दुवै चरणको आयोजना सम्पन्न भएपछि काठमाडौं बासीले दैनिक ५१ करोड लिटर पानी पाउनेछन् । बढी भएको पानी बागमतीमा बगाउने सरकारी योजना छ ।