राष्ट्रिय आविस्कार केन्द्र र ब्रिटिश कलेजले कोभिड–१९ राहत कार्यमा सहकार्य गर्ने

काठमाडौं, जेठ २४ – थापाथलीस्थित द ब्रिटिश कलेज र राष्ट्रिय आविस्कार केन्द्र (नेशनल इनोभेशन सेन्टर) ले संयुक्त रुपमा कोरोना महामारीविरुद्ध लड्न नयाँ सामाजिक कल्याण सहयोगको घोषणा गरेका छन् । दुवै संस्थाले संयुक्त रुपमा मिलेर नेपालको वर्तमान संकटको अवस्थामा सहयोगका निम्ती नेशनल इनोभेशन सेन्टरलाई थप उर्जाशील बनाउन र राहतकार्यलाई अझ सुदृढ पार्नका लागि एक परियोजना अगाडि बढाउने भएका छन् ।

कलेजका निर्देशक महेन्द्रराज कँडेलले भने, ‘नेशनल इनोवेशन सेन्टरसँग साझेदारी गर्न पाउँदा हामी अत्यन्त खुशी छौँ । ब्रिटिश कलेजले लामो समयदेखि यस्ता प्रकारको साझेदारी र सामाजिक कार्यहरू गर्दै आएको छ । हामी विश्वास गर्दछौँ कि कोभिड १९ विरूद्ध लड्न यसले धेरै सहयोगी भुमिका खेल्ने छ । आउने दिनमा पनि यी प्रकारका साझेदारी र सीएसआर गर्दै जानेछौँ ।’

सामूहिक रूपमा, टीबीसी र एनआइसीले कोभिड–१९ विरुद्ध फ्रन्टलाइनमा खटिएका चिकित्सक तथा स्वास्थ्यकर्मीलाई आवयश्क स्वास्थ्य सामाग्रीहरु वितरण गर्ने लक्ष्य राखेको छ । यो संकटको समयमा आम मानिसलाई आवश्यक सेवाहरू प्रदान गरिने बताइएको छ । यसका लागि टिबिसीले राष्ट्रिय आविस्कार केन्द्रलाई अनुदान दिने छ । यो उद्देश्य प्राप्तिका लागि एनआइसीले सांगठनिक र व्यक्तिगत रुपमा निरन्तर अनुसन्धान गर्दै योगदान गर्ने छ ।

यस क्रममा संयुक्त रुपमा टीबीसी र एनआइसीले कोभिड–१९ राहत कार्यक्रमलाई विभिन्न तरिकाले अगाडि बढाउने बताएका छन् । कोभिड राहतको क्षेत्रमा नयाँ घटनाक्रमको बारेमा अनुसन्धान गर्ने, फ्रन्टलाइन खटेर काम गर्नेहरूलाई सहयोग पुर्याउन सुरक्षात्मक उपकरण विकास गर्ने, र भेन्टिलेटरजस्ता सान्दर्भिक चिकित्सा उपकरणहरू मर्मत गर्ने र ल्याउने कामलाई सञ्चालनमा ल्याउने बताएको छ ।

वितरण र पहुँच केन्द्रित गर्ने सुनिश्चित गर्नका लागि सबैभन्दा धेरै खाँचोमा परेकाहरुलाई सहयोग पुर्याइने तथा टीबीसीको इनोभशन हब र इनक्युबेशन सेन्टरमा कलेजका विद्यार्थीहरूद्वारा सम्बन्धित प्राजेक्टमा अनुसन्धान हुने बताइएको छ । एनआईसी अधिकारीहरूद्वारा निरिक्षण र प्रोत्साहन गर्नका लागि सेमिनार, वेबिनारहरू र कार्यशालाहरू गर्ने छन् । यसले महामारीका बीच कसरी संकटको सामना गर्ने सोच विकास गर्ने अपेक्षा गरिएको छ ।