रुकुम पश्चिम हत्याकाण्ड : नवराज विकसहित अन्य मृतकका परिवारद्वारा अन्दोलनको चेतावनी

काठमाडौं, पुस १९ – रुकुम पश्चिम हत्याकाण्डमा मारिएका नवराज विकसहित अन्य मृतकका परिवार तथा आफन्तहरुले सरकारसंग निष्पक्ष छानबिनसहित न्यायको माग गरेका छन् ।

शनिबार काठमाडौंमा पत्रकार सम्मेलनको आयोजना गरी पीडित परिवार र उनका आफन्तहरुले न्याय नपाए आन्दोलनमा जाने चेतावनी दिएका हुन् । हत्याकाण्डको नौ महिना बितिसक्दा पनि पीडित परिवारले न्याय नपाएको भन्दै सरकारसँग पुनः निष्पक्ष छानबिन र न्यायको माग गरेका हुन् ।

कार्यक्रममा नेपाल राष्ट्रिय दलित समाज कल्याण संघका अध्यक्ष त्रिलोक चन्द विश्वास विकले उक्त मानवता विरुद्व अपराध भएको बताए । उनले भने, ‘जनप्रतिनिधिको संलग्नतामा यो घटना घटेको थियो । कानुन बमोजिम दण्ड दिनुपर्छ ।’

उक्त घटना जातिय विवादले गर्दा घटेको बताए । घटना चानचुने नरहेको उनले बताए । उनले भने, न्याय कहाँ छ ? के यो देशमा न्याय मरेकै हो त ? न्यान सबैलाई एक समान हुनुपर्छ भन्दै उनले आक्रोश पोखे ।

त्यसैगरी कार्यक्रममा वरिष्ठ अधिवक्ता दिनेश त्रिपाठीले रुकुम घटना सभ्यता र लोकतन्त्रमाथि प्रहार भएको बताए । उनले भने, ‘मानवतामाथिको कलङक थियो । घटनाले नेपालको अन्तर्राष्ट्रिय बेइजती भएको थियो । रुकुमको घटनामा न्याय हुनुपर्छ । जो अडण्डित हुन्छ भने विधिको शासन छैन् ।’

अपराध नै नगरी जातीय विभेदका कारण बालकहरुको क्रुरतापूर्वक हत्या गरिएको उनले बताए । उनले भने, ‘रुकुम घटनामा न्याय भएन भने विधिको शासन, लोकतन्त्र र अदालत मर्नेछ । दोषी पूर्पक्षका लागि जेल बस्नै पर्छ ।’

नवराज विकका बावु मोहनलाल विकले केटीको आमा लक्ष्मी मल्ल एक लाख धरौटीमा छुटेको र अन्य दोषी पनि सामान्य तरिकाले छुटेको भन्दै असन्तुष्टि व्यक्त गरे । उनले भने, ‘यो कस्तो न्याय हो । सर्वोच्चबाट न्याय पाउने आशा गरेका छौँ ।’

गोविन्द शाहीकी आमा देवी शाहले राज्यले न्याय नदिएको भन्दै असन्तुष्टि पोखिन् । उनले भनिन्, ‘हामी न्याय पाउन काठमाडौँ आएका हौँ । न्याय नपाए र दोषीलाई कारवाही नभए हामी आन्दोलन गर्नेछौँ ।’

प्रहरी प्रशासनको कमजोरीका कारण शव ढिला पाएको उनले बताइन् । उनले भनिन्, ‘हामी पार्टी र नेतालाई चिन्दैनौँ ।’

सन्जिब विककी आमा सीता विकले कहाँ छ कानून ? भन्दै प्रश्न औँल्याइन् । उनले भनिन्, ‘हामी बाहुन क्षेत्री वा अन्य जात भएको भए न्याय पाउने थियौँ । तर, दलित भएको कारण न्याय पाएका छैनौँ । हामीले न्याय पाउँदैनौँ त ?’

लक्ष्मी सुनुवारले हत्या काण्डको दोषी कारवाही गर्ने माग गरिन् र मुख्य दोषी केटीलाई बालबालिका भनेर छोडेको बताइन् । उनले भनिन्, ‘त्यो केटीलाई सुधार केन्द्र राख्नुपर्छ । केटीकी आमालाई जेल हाल्नुपर्छ ।’